Revista e njohur amerikane “Newsweek” i ka kushtuar një artikull zgjerimit të aktivitetit të grupeve kriminale shqiptare në trafikun ndërkombëtar të drogës, duke ngritur alarmin për depërtimin e tyre në tregun amerikan, pas konsolidimit të pozicioneve në Britaninë e Madhe. Sipas revistës, rrjetet shqiptare të narkotikëve po shtojnë ndikimin në SHBA, ndërsa paralajmërimi mbështetet edhe në vlerësimet e Neil Woods, një ish-oficer policie që për 14 vite ka qenë i infiltruar në bandat e drogës në Mbretërinë e Bashkuar.
Në prononcimin për “Newsweek”, Woods deklaron se grupet shqiptare kanë bërë përparime të konsiderueshme edhe në tregun amerikan të kokainës. Ai e lidh këtë zhvillim me bashkëpunimin ndërkombëtar mes organizatave kriminale, duke theksuar se zgjerimi i rrjeteve të furnizimit ka ndikuar në uljen e çmimit dhe rritjen e pastërtisë së kokainës. Sipas tij, një rol të rëndësishëm në këtë aktivitet luan edhe bashkëpunimi mes grupeve shqiptare dhe atyre braziliane.
Artikulli vjen në prag të publikimit të dokumentarit të Sky News, “The Drug Lords Next Door”, i cili trajton mënyrën se si rrjetet shqiptare kanë ndërtuar zinxhirë ndërkombëtarë furnizimi, kanë rekrutuar shpërndarës përmes rrjeteve sociale dhe kanë krijuar struktura të sofistikuara të shpërndarjes së kokainës.
“Newsweek” rikujton gjithashtu se organizatat kriminale shqiptare kanë qenë të pranishme në SHBA prej vitesh. Në vitin 2013, prokurorët federalë në Nju Jork njoftuan dënimin e 49 anëtarëve dhe bashkëpunëtorëve të një organizate kriminale shqiptare, e cila vepronte në tre kontinente dhe shpërndante drogë në disa shtete amerikane.
Ndërkohë, raporti i DEA-s për vitin 2025 evidenton rritjen e pastërtisë mesatare të kokainës së analizuar në nivelin e shitjes me shumicë, nga 86% në vitin 2023 në 88% në vitin 2024. Ky është një tjetër tregues që përputhet me vlerësimet e ekspertit për ndryshimet në tregun ndërkombëtar të narkotikëve.