Rubio kritikon GJPN-në dhe OKB-në: E drejta ndërkombëtare po përdoret si instrument kundër administratës Trump

Sekretari i Shtetit i SHBA-së, Marco Rubio, kritikoi ashpër Gjykatën Ndërkombëtare Penal, GJPN, dhe OKB-në në një fjalim para juristëve dhe studentëve të drejtësisë, duke marrë duartrokitje të forta nga publiku.

Duke iu drejtuar Konventës Kombëtare të Avokatëve të Shoqërisë Federaliste, një grup i vetëshpallur konservator, Rubio tha se Departamenti i Shtetit kishte dëgjuar të përdoret e drejta ndërkombëtare kundër “pothuajse çdo vendimi ose veprimi të madh të politikës së jashtme” të administratës Trump.

Ai përmendi urdhrin e Presidentit Donald Trump që ushtria të fundosë anijet e kartelit në Karaibe, duke thënë se Uashingtoni ishte akuzuar për shkelje të ligjit ndërkombëtar me sulmet.

Rubio tha se kryeprokurori themelues i asaj që ai e quajti “Gjykata Ndërkombëtare Penale e rreme dhe e paligjshme” madje kishte akuzuar SHBA-në për krime kundër njerëzimit.

Ai tha se akuza të ngjashme erdhën nga OKB-ja kur forcat amerikane kapën presidentin venezuelian Nicolas Maduro këtë janar dhe e sollën atë në SHBA për t’u përballur me akuza penale federale.

“Për këtë elitë globale, e drejta ndërkombëtare nuk është një grup rregullash neutrale”, tha Rubio.

“E drejta ndërkombëtare është një instrument, një instrument për të çuar përpara interesat e tyre nën pretekstin e parimeve universale”, shtoi ai.

Rubio mbrojti “vendimin e paprecedentë të Trump për të sanksionuar Gjykatën e rreme Ndërkombëtare Penale”, duke e përshkruar atë si një “tribunal botëror të pazgjedhur” që pretendon autoritet mbi shtetet sovrane, përfshirë ato që nuk e kanë pranuar kurrë juridiksionin e saj.

“Amerikanët nuk kanë rënë kurrë dakord t’i nënshtrohen autoritetit të GJPN-së, por ajo gjykatë dhe aleatët e saj në burokracinë globale e kanë emëruar veten gjyqtar, juri dhe ekzekutor të rendit ndërkombëtar”, tha ai.

“Ata mendojnë se kanë të drejtë të sundojnë mbi të gjithë, por nuk i japin llogari askujt”, shtoi Rubio.

Diplomati më i lartë amerikan bëri gjithashtu paralele me sistemin gjyqësor të SHBA-së, duke akuzuar “gjykatat aktiviste” se kërkojnë të “qeverisin me anë të urdhrave gjyqësorë”.

Ai argumentoi se kritikët e administratës e shihnin “qëllimin themelor të ligjit, si të ligjit amerikan ashtu edhe të ligjit ndërkombëtar”, si dobësim të Shteteve të Bashkuara.

Rubio i hodhi poshtë këto argumente si të pabaza në historinë amerikane.

“Nuk ka asgjë, nuk ka asgjë në historinë tonë, apo në historinë e ndonjë kombi tjetër të madh, që na kërkon të njohim autoritetin ose legjitimitetin e ndonjërës prej këtyre ideve qesharake”, tha ai.