Aksident fatal në rrugën e Arbrit, 2 të vdekur dhe 5 të plagosur

Një aksident tragjik është regjistruar paraditen e kësaj të shtune në Xibër, pranë tunelit të Murrizit, ku përplasja e dy automjeteve ka shkaktuar dy viktima dhe pesë persona të tjerë kanë mbetur të lënduar.

Ngjarja ka ndodhur rreth orës 10:15, kur dy automjete, që drejtoheshin nga shtetasit B. O., rreth 42 vjeç, dhe A. F., rreth 45 vjeç, janë përplasur me njëri-tjetrin.

Si pasojë e përplasjes, ka humbur jetën drejtuesi 42-vjeçar i njërit prej automjeteve, si dhe një pasagjere, shtetasja M. F., e cila udhëtonte në automjetin tjetër.

Ndërkohë, pesë persona janë transportuar në spital për të marrë ndihmën mjekësore dhe për t’iu nënshtruar kontrolleve të nevojshme.

Në vendngjarje kanë mbërritur shërbimet e Policisë dhe grupi hetimor, të cilët po punojnë për të zbardhur shkaqet dhe rrethanat e aksidentit tragjik.