Shpërthim me lëndë plasëse në derën e një banese në Tiranë, policia jep detajet

Një shpërthim me lëndë plasëse ka tronditur zonën e Xhamllikut në Tiranë gjatë orëve të para të mëngjesit të kësaj të shtune. Fatmirësisht, nga ngjarja nuk raportohet për persona të lënduar, por vetëm për dëme materiale.

Sipas të dhënave paraprake, ngjarja ka ndodhur rreth orës 02:50 të mëngjesit në rrugën “Sadik Petrela”, ku një sasi e dyshuar lënde plasëse ishte vendosur në derën e një banese në katin e parë.

Policia dhe grupi hetimor kanë mbërritur menjëherë në vendngjarje dhe po punojnë për zbardhjen e plotë të rrethanave, këqyrjen e kamerave të sigurisë në zonë për identifikimin e autorëve, si dhe zbulimin e motiveve.

Njoftimi i Policisë:

Më datë 14.11.2026, rreth orës 02:50, në rrugën “Sadik Petrela”, ka shpërthyer një sasi e vogël e dyshuar lënde plasëse e vendosur në derën e jashtme të apartamentit të shtetases A. M., 47 vjeçe.

Si pasojë janë shkaktuar dëme të vogla materiale.

Grupi hetimor, nën drejtimin e Prokurorisë, vijon veprimet për identifikimin dhe kapjen e autorit dhe dokumentimin e plotë të rastit.