Media amerikane lëshon alarmin: Pas Britanisë, mafia shqiptare e drogës po depërton në SHBA

Revista e njohur amerikane ‘Newsweek’ lëshon alarmin se pas Britanisë, mafia shqiptare e drogës po depërton në SHBA.

Grupet e krimit të organizuar shqiptar po depërtojnë gjithnjë e më shumë në tregtinë e drogës në Shtetet e Bashkuara, sipas një ish-oficeri policie të infiltruar në rrjetet e narkotikëve, i cili paralajmëron se bandat mund ta zgjerojnë ndikimin e tyre në tregun amerikan të kokainës.

Neil Woods, i cili kaloi 14 vite duke u infiltruar në bandat e drogës në Mbretërinë e Bashkuar, i tha revistës ‘Newsweek’ se kriminelët shqiptarë kanë bërë gjithashtu “përparime të konsiderueshme” në SHBA.

Ai bëri krahasime me ngritjen e bandave shqiptare në Britani, ku ato janë kthyer në aktorë të rëndësishëm të tregtisë së kokainës. Si tregues të ndryshimit të tregut, ai përmendi rënien e çmimeve të kokainës dhe rritjen e pastërtisë së saj.

Woods, ekspert i tregtisë globale të kokainës, deklaroi: “Depërtimi i tyre i konsiderueshëm është në thelb ndërkombëtar dhe përfshin edhe SHBA-në. Çmimi është ulur dhe pastërtia është rritur në SHBA, njësoj si kudo tjetër. Pse? Sepse ky bashkëpunim ndërkombëtar ka krijuar një efikasitet më të madh.”

Paralajmërimi i Woods vjen përpara publikimit të dokumentarit të Sky News, ‘The Drug Lords Next Door’, i cili zbulon se si rrjetet shqiptare të drogës kanë ndërtuar zinxhirë të sofistikuar ndërkombëtarë furnizimi, kanë rekrutuar shpërndarës në rrugë përmes rrjeteve sociale dhe kanë krijuar biznese fitimprurëse të shpërndarjes së kokainës.

Dokumentari ndjek gazetarë të infiltruar, të cilët depërtuan në bandat shqiptare në Britani, duke zbuluar mënyrën se si rekrutohen shpërndarësit dhe se si bazat e të dhënave të klientëve shiten për qindra mijëra dollarë.

Sipas revistës, grupet shqiptare të krimit të organizuar nuk janë të panjohura në Shtetet e Bashkuara. Në vitin 2013, prokurorët federalë në Nju Jork njoftuan se 49 anëtarë dhe bashkëpunëtorë të një organizate ndërkombëtare kriminale shqiptare ishin dënuar për vepra penale që lidhen me trafikun e drogës.

Rrjeti vepronte në tre kontinente dhe shpërndante drogë në disa shtete amerikane, përfshirë Nju Jorkun, Kaliforninë, Xhorxhian, Koloradon dhe Floridën.

Sipas Departamentit të Drejtësisë, anëtarët e tij trafikonin kokainë të siguruar nga Meksika dhe Amerika e Jugut, krahas marijuanës, ekstazisë dhe barnave me recetë.

Edhe Departamenti i Shtetit ka identifikuar rrjete kriminale të drejtuara nga shqiptarë, të cilat veprojnë në SHBA, Evropë, Emiratet e Bashkuara Arabe dhe Amerikën e Jugut.

Duke folur për ‘Newsweek’, Woods shtoi: “Lidhja e rëndësishme që e përfshin Amerikën në këtë diskutim është ajo mes krimit të organizuar shqiptar dhe atij brazilian”.

“Tashmë, pjesa më e madhe e përpunimit dhe e logjistikës kryhet përmes Brazilit, dhe prej andej SHBA-ja është vetëm një nga destinacionet, mes shumë të tjerave. Tregu është zgjeruar vazhdimisht.”

Vlerësimi Kombëtar i Kërcënimit nga Droga për vitin 2025, i publikuar nga Administrata Amerikane Kundër Drogës (DEA), zbuloi se pastërtia mesatare e mostrave të kokainës të analizuara në nivelin e shitjes me shumicë u rrit nga 86 për qind në vitin 2023, në 88 për qind në vitin 2024.

Ky konstatim përputhet me vëzhgimin e Woods se pastërtia e kokainës ka ardhur duke u rritur.