“Kemi zhvilluar një ndeshje fantastike, – deklaroi Jürgen Klopp pas fitores 3-1 ndaj Serbisë në Beograd. – Sigurisht që mund të shënonim më shumë gola, por tani kjo nuk ka rëndësi. Nuk mund të themi vazhdimisht se duhet të ishim më përpara në këtë proces. Shumë gjëra funksionuan në mënyrë të shkëlqyer, veçanërisht kundërpresingu”.

Gjermania dominoi edhe statistikisht, me 79.3% zotërim topi dhe 844 pasime. Që nga shtatori 2012, vetëm dy herë kishte regjistruar përqindje më të lartë zotërimi: 85% kundër San Marinos (2016) dhe Lihtenshtajnit (2021). Ndërsa 844 pasime ishin shifra më e lartë që nga tetori 2019, kundër Estonisë.

Klopp pranoi se skuadra pati një moment vështirësie në fillimin e pjesës së dytë, por goli i Brajan Grudës për 3-0 riktheu qetësinë: “Qëllimi ishte të zhvillonim një ndeshje bindëse, për veten dhe për të gjithë jashtë ekipit. Donim një finale në Berlin, tani e kemi. Duam t’iu tregojmë të gjithëve se futbolli gjerman është në duar të sigurta, kemi lojtarë të mirë dhe po japim maksimumin”.

Trajneri theksoi se Gjermania duhet të dëshmojë në ndeshje atë që po tregon në stërvitje: “Duam të tregojmë se kemi mësuar dhe jemi zhvilluar së bashku. Mesazhi i parë është që bota të shohë se ne dimë të luajmë futboll”.