Të paktën 24 persona humbën jetën pasi një autobus i vogël u përplas me një kamion në shtetin Assam, në verilindje të Indisë, të premten, njoftuan zyrtarët.

Ministri i shtetit, Atul Bora, u tha gazetarëve se të paktën 11 persona të tjerë mbetën të plagosur në aksidentin, i cili ndodhi në një autostradë pranë Parkut Kombëtar Kaziranga. Shumë prej viktimave ishin nxënës shkolle, tha ai.

Rreth 35 persona, përfshirë edhe shoferin, ndodheshin në autobus, raportuan gazeta e përditshme indiane Hindustan Times dhe media të tjera, duke iu referuar policisë.

Hindustan Times citoi një të mbijetuar, i cili tha se autobusi ishte i mbipopulluar dhe se disa pasagjerë qëndronin në këmbë në korridorin e tij.

Sipas raportimeve të mediave, zyrtarët dyshojnë se autobusi po udhëtonte me shpejtësi të madhe kur doli nga korsia e tij dhe u përplas me kamionin që po vinte përballë. Mësohet se drejtuesi i kamionit dhe pasagjeri që ndodhej me të i mbijetuan aksidentit, por mbetën të plagosur.

Kryeministri i shtetit Assam, Himanta Biswa Sarma, shprehu tronditjen e tij në rrjetet sociale. Ai tha se përmasat e humbjeve në këtë aksident kishin prekur thellësisht të gjithë./DPA News