Kreu i Partisë Demokratike, Sali Berisha, ka zhvilluar një takim me drejtuesit e degëve të PD-së në Kukës, Has dhe Tropojë, ku ka lëshuar akuza ndaj kryeministrit Edi Rama.
Berisha e cilësoi qeverisjen e Ramës si një regjim armiqësor ndaj shqiptarëve, që sipas tij synon të zbrazë vendin nga qytetarët dhe ta kthejë Shqipërinë në një territor të kontrolluar nga droga dhe mafia.
Ai falënderoi mbështetësit demokratë të qarkut të Kukësit për votën, duke e cilësuar atë jo thjesht si mbështetje për PD-në, por si një votë për mbrojtjen e pluralizmit politik, lirisë dhe dinjitetit të shqiptarëve.
Gjatë fjalës së tij, Berisha u ndal edhe te protestat e zhvilluara gjatë muajve të fundit, duke i cilësuar ato si një lëvizje të fuqishme popullore kundër qeverisë. Ai përmendi veçanërisht angazhimin e studentëve dhe gjimnazistëve, të cilëve u atribuoi një rol të rëndësishëm në revoltën kundër kryeministrit.
Sipas kreut të PD-së, përballë reagimit të të rinjve dhe protestave, Rama ka marrë një goditje të pakthyeshme politike.
“Studentët dhe gjimnazistët i dhanë atij dënimin, vdekje politike pa apel”, deklaroi Berisha.
Ai e përshkroi periudhën e fundit si një nga më pozitivet në historinë kombëtare, duke pretenduar se protesta ka dëshmuar se kundërshtimi ndaj qeverisë nuk kufizohet vetëm te opozita, por përfshin qytetarë me bindje të ndryshme politike.
