Kryeministri në detyrë i Kosovës, Albin Kurti, është takuar me presidentin e Konfederatës së Zvicrës, Guy Parmelin, në kuadër të Samitit të Komunitetit Politik Evropian (EPC), ku kanë diskutuar për marrëdhëniet ndërmjet dy vendeve dhe bashkëpunimin e mëtejshëm, shkruan Telegrafi.
Përmes një postimi në Facebook, Kurti ka bërë të ditur se gjatë bisedës është vënë në pah edhe roli i mërgatës kosovare në forcimin e lidhjeve ndërmjet Kosovës dhe Zvicrës.
“Marrëdhënieve të mira dypalëshe u paraprin lidhja e fortë e mërgatës sonë me popullin dhe shtetin zviceran”, ka shkruar Kurti.
Ai ka shprehur mirënjohje për kontributin e Zvicrës, duke veçuar edhe fillimin e një kapitulli të ri të bashkëpunimit ndërmjet dy vendeve, pas hyrjes në fuqi të Marrëveshjes për Tregti të Lirë (EFTA), muajin e kaluar.
Sipas Kurtit, marrëveshja përfshin jo vetëm mallrat, por edhe shërbimet.
Postimi i kryeministrit në detyrë vjen pas takimit të zhvilluar në kuadër të Samitit të Komunitetit Politik Evropian (EPC)./Telegrafi/
