Ancelotti qetëson Barcelonën për Raphinhën: Shëndeti i lojtarëve është prioritet, nuk do të rrezikojmë

Carlo Ancelotti ka dërguar një mesazh qetësues për Barcelonën dhe klubet e tjera, duke garantuar se Brazili nuk do të rrezikojë shëndetin e futbollistëve në dy miqësoret e këtij grumbullimi. Shqetësimi kryesor i katalanasve lidhet me Raphinhas, i cili është dëmtuar në tri paraqitjet e fundit me kombëtaren.

“Prioriteti është gjithmonë shëndeti i lojtarit. Nëse një futbollist stërvitet plotësisht dhe është në formë të mirë, mund të luajë. Ne i menaxhojmë minutat dhe, nëse nuk stërvitet, nuk luan”, deklaroi Ancelotti në prag të sfidës me Japoninë në Singapor.

Tekniku italian u përpoq të largonte çdo shqetësim nga klubet, duke theksuar se stafi i Brazilit ka informacionin e nevojshëm për të monitoruar gjendjen fizike të lojtarëve.

“Klubet mund të jenë të qeta. Përparësia e të gjithëve është shëndeti i sportistit. Duam që lojtarët të kthehen të gatshëm, të përgatitur dhe pa pasur nevojë për kontrolle të tjera mjekësore”, shtoi trajneri i Seleçaos.

Ancelotti foli edhe për Bruno-n, i cili ka pasur një shqetësim të lehtë dhe nuk është stërvitur plotësisht, por sipas tij është në gjendje të luajë. Megjithatë, minutat e tij do të varen nga vlerësimi i stafit teknik dhe mjekësor.