Prodhuesi i automjeteve Mercedes ka vendosur të pezullojë të gjitha investimet e mëtejshme në fabrikat në Gjermani dhe po shqyrton mundësinë e mbylljes së disa prej tyre, për shkak të kostove të larta të prodhimit dhe ngecjes së negociatave me përfaqësuesit e punonjësve. Drejtori i prodhimit, Michael Schiebe pohoi për DW se, pavarësisht bisedimeve intensive me këshillin e punëmarrësve dhe sindikatën IG Metall, ende nuk ka një perspektivë për arritjen e marrëveshjes. Drejtuesit e kompanisë kërkojnë uljen e kostove përmes zgjatjes së javës së punës nga 35 në 40 orë, pa kompensim shtesë financiar. Ky propozim kundërshtohet nga sindikata, e cila e konsideron javën 35-orëshe një nga arritjet kryesore të saj. Kompania synon gjithashtu të rishikojë pagesat shtesë, shpërblimet për pushimet dhe Krishtlindjet, si dhe përfitimet nga pjesëmarrja në fitim. Sipas Schiebe, kostoja e një ore pune në prodhim në Gjermani është në disa raste deri në pesë herë më e lartë se në fabrikat e Mercedes në Europën Lindore. Ai paralajmëroi se, nëse nuk arrihet një marrëveshje për uljen e kostove, modelet e reja do të prodhohen vetëm jashtë Gjermanisë. Mercedes ka gjithsej 12 qendra prodhimi në vend. Në rrezik për mbyllje janë potencialisht dy fabrika: një për montimin e karrocerive dhe një për prodhimin e sistemeve të lëvizjes. Kompania po përballet me rënie të shitjeve dhe fitimeve, si dhe me presion të shtuar nga konkurrenca ndërkombëtare, veçanërisht nga prodhuesit kinezë. Drejtuesit thonë se synojnë të shmangin mbylljet, por paralajmërojnë se pa uljen e kostove e ardhmja e fabrikave gjermane mbetet e pasigurt.