Një ndërprerje masive e shërbimeve të Microsoft-it ka lënë përdoruesit në mbarë botën pa akses në postën elektronike Outlook, mjetet për organizimin e takimeve në Teams dhe të tjera shërbime që janë bërë pjesë e pandashme e punës së përditshme në zyra.
Në Shtetet e Bashkuara, punonjësit e disa kompanive, të lodhur nga problemet, u larguan më herët nga puna të enjten. Në Australi, bizneset nuk mund të printonin faturat, ndërsa disa shkolla nuk arritën të zhvillonin mësimin në internet të premten.
Dhe nuk kishte një zgjidhje të shpejtë. Deri në orën 3:30 të mëngjesit, sipas orës GMT, sot, ndërprerja ishte ende e përhapur, duke prekur miliona përdorues, numri i saktë i të cilëve nuk dihej.
Microsoft po publikon përditësime në platformën X dhe në faqen e saj të dedikuar për gjendjen e shërbimeve.
Po shohim rezultate pozitive nga përpjekjet tona për të rinisur infrastrukturën e prekur dhe për të rikthyer gradualisht funksionimin e serverëve, duke i trajtuar ata në mënyrë të veçuar.
Ndërprerja ka vazhduar për shumë orë, duke shkaktuar reagime nga më të ndryshmet.
Disa punonjës zyrash në SHBA e pritën me kënaqësi ndërprerjen e postës elektronike dhe bënë shaka se mund ta nisnin fundjavën më herët. Të tjerë vijuan punën pothuajse normalisht, duke komunikuar me kolegët përmes Slack, telefonit apo edhe në mënyrën tradicionale, ballë për ballë.
Por ndërprerja, e cila nisi rreth mesditës sipas orës së Bregut Lindor të SHBA-ve, shkaktoi probleme serioze, veçanërisht pasi zgjati më shumë se një apo dy orë.
U prekën të gjitha shërbimet e Microsoft 365 që ndërveprojnë me Exchange Online dhe sistemet e postës elektronike. Këtu përfshihen Outlook, SharePoint, Teams, Microsoft 365 dhe asistenti i inteligjencës artificiale Copilot.
Për pasojë, bizneset e vogla nxituan të gjenin alternativa ndaj Microsoft-it për të komunikuar. Autoritetet vendore u kërkuan qytetarëve të telefononin, në vend që të dërgonin mesazhe elektronike.
