Një operacion i gjerë ndërkombëtar kundër rrjeteve kriminale që përdornin Dark Web-in për shitjen e drogës dhe armëve ka përfunduar me 354 persona të arrestuar dhe sekuestrimin e sasive të mëdha të lëndëve narkotike, armëve të zjarrit dhe parave.
Operacioni, i koduar “TorNado”, u zhvillua nga maji 2025 deri në tetor 2026, me pjesëmarrjen e 14 shteteve dhe koordinimin e Europolit.
Arrestimet më të shumta u regjistruan në SHBA, ku u prangosën 132 persona. Pas tyre renditen Britania e Madhe me 59 të arrestuar, Hungaria me 45, Gjermania me 41 dhe Franca me 23.
Gjatë operacionit, në Evropë u sekuestruan afro një ton lëndë narkotike, përfshirë amfetaminë, ketaminë, MDMA, kokainë dhe kanabis.
Ndërsa në SHBA u sekuestruan më shumë se 4.8 tonë drogë, 152 armë zjarri dhe rreth 150 milionë euro në para të gatshme dhe kriptovaluta.
Në shënjestër të operacionit ishin rrjetet që përdornin platformat e fshehta të internetit për të tregtuar drogë dhe armë, përfshirë edhe fentanilin, një substancë shumë e rrezikshme.
Operacioni përfshiu qindra ndërhyrje në vende të ndryshme të botës, ndërsa hetimet zbuluan përmasat e aktivitetit kriminal që zhvillohej përmes këtyre platformave.
Dark Web është një pjesë e internetit që nuk aksesohet përmes motorëve të zakonshëm të kërkimit dhe ku përdoruesit mund të komunikojnë në mënyrë anonime. Krahas përdorimeve të ligjshme, ai shfrytëzohet edhe për tregtimin e drogës, armëve dhe mallrave të tjera të paligjshme.
