Muçi flet i ekzaltuar pas golit me Finlandën: Dua që Salah të më propozoi për Liverpool

Një gol spektakolar, një fitore 2-0 me Kombëtaren dhe një ëndërr që nuk e fsheh më. Ernest Muçi po shijon një nga momentet më të mira të tij, ndërsa pas suksesit ndaj Finlandës ka zbuluar edhe se ku do të dëshironte ta shihte veten në të ardhmen.

Sulmuesi shqiptar e ka shprehur me humor dhe ambicie dëshirën për të përfunduar te Liverpooli, madje duke i drejtuar një mesazh të veçantë Mohamed Salahut.

“Shpresoj që Salah të më propozojë te Liverpooli”, tha Muçi, duke vlerësuar yllin egjiptian jo vetëm për atë që bën në fushë, por edhe për kontributin e tij për ekipin.

Por, përpara se të mendojë për një transferim të madh, Muçi ka dhënë një sinjal të rëndësishëm me fanellën kuqezi. Goli i realizuar ndaj Finlandës, në fitoren 2-0 të Shqipërisë, ishte një prej atyre momenteve që sulmuesi do të dëshironte t’i përsëriste.

Vetë futbollisti e cilësoi si një nga golat më të bukur të karrierës, ndërsa tregoi se ndihet gjithnjë e më mirë në fushë dhe në raport me pjesën tjetër të skuadrës.

Ambicia e tij shkon edhe më tej. Muçi synon të luajë në një nga pesë kampionatet më të forta të Europës, duke e konsideruar këtë si një objektiv për të ardhmen.

“Jam shumë i lumtur që po tregoj më të mirën. Shpresoj që t’ia arrij një ditë të transferohem në një nga pesë ligat më të forta në botë”, u shpreh ai.

Sulmuesi foli edhe për periudhën e vështirë që ka kaluar, problemet fizike dhe besimin që tashmë po merr nga trajneri, shokët e skuadrës dhe tifozët.

Për momentin, Muçi ka një gol për t’u mbajtur mend dhe tri pikë të rëndësishme me Shqipërinë. Për Liverpoolin, ndërkohë, mbetet të shihet nëse dëshira e tij do të marrë ndonjëherë përgjigje nga Salah.