Rreth nëntë persona të cilët janë pjesë e një delegacioni zyrtar nga Somalia rezultojnë të zhdukur pas një vizite në Kosovë. Ata kanë shkaktuar shqetësim te autoritetet në Prishtinë duke hapur kështu një çështje që lidhet me dyshimet për abuzim me vizat.
Media somaleze “Garowe Online”, ka raportuar lajmin duke shkruar se Ministria e Jashtme e Diasporës e Kosovës i ka kërkuar zyrtarisht qeverisë së Somalisë të japë sqarime për vendndodhjen dhe gjendjen e nëntë personave.
Sipas medias, delegacioni somalez mbërriti në Kosovë më 25 tetor 2026. Ai drejtohej nga ministri i Shtetit për Punët Publike, Strehimin dhe Rindërtimin, Said Mohamed Mohamud, dhe zëvendësministrja e Porteve, Fartuun Abdikadir Farah.
Por gjatë qëndrimit në Prishtinë, nëntë anëtarët shoqërues të delegacionit u larguan nga akomodimi i tyre në Dua Village, pa njoftuar autoritetet që kishin përgjegjësinë për shoqërimin e tyre.
Sipas dokumentit diplomatik të cituar nga “Garowe Online”, largimi është konstatuar më 28 tetor, ndërsa personat në fjalë kishin lënë hotelin një mbrëmje më parë, rreth orës 19:10.
Situata u bë edhe më e paqartë kur nëntë personat nuk u paraqitën në terminalin VIP të Aeroportit Ndërkombëtar të Prishtinës, ku ishte planifikuar nisja e delegacionit. Ndërkohë, dy drejtuesit e tij, Said Mohamed Mohamud dhe Fartuun Abdikadir Farah, u larguan nga Kosova më 28 tetor.
Përballë mungesës së informacionit, Ministria e Jashtme e Kosovës i dërgoi më 30 tetor një notë verbale diplomatike autoriteteve somaleze, duke kërkuar të dhëna për vendndodhjen, sigurinë dhe statusin e nëntë personave.
Përtej zhdukjes së nëntë personave, çështja ka shkaktuar edhe pasoja politike në Somali.
Sipas “Garowe Online”, dy ministra të qeverisë federale somaleze raportohet se janë shkarkuar, pas dyshimeve se kishin lehtësuar udhëtimin e nëntë personave kundrejt pagesave.
Dyshimet janë se këta persona janë paraqitur si punonjës të administratës shtetërore, me qëllim përfshirjen në delegacionin zyrtar dhe përfitimin e vizave për udhëtim.
Megjithatë, media sqaron se këto pretendime nuk përfshihen në komunikimin zyrtar diplomatik të Kosovës dhe nuk janë konfirmuar në mënyrë të pavarur.
Burime të cituara nga media somaleze pretendojnë gjithashtu se nëntë personat mund të kenë udhëtuar drejt vendeve të tjera dhe të kenë kërkuar azil. Por destinacioni i tyre dhe statusi aktual i qëndrimit nuk janë verifikuar.
Nga ana tjetër, autoritetet kosovare kanë konfirmuar vetëm largimin e tyre nga akomodimi në Prishtinë dhe faktin se nuk kanë mundur të përcaktojnë nëse janë larguar përfundimisht nga territori i Kosovës.
Rasti ka ngritur pikëpyetje mbi mënyrën e përzgjedhjes së anëtarëve të delegacioneve zyrtare dhe mundësinë e përdorimit të udhëtimeve institucionale për qëllime që nuk lidhen me aktivitetin shtetëror.
Prishtina është në pritje të përgjigjeve nga autoritetet somaleze për fatin e nëntë personave që rezultojnë të zhdukur.
