Pothuajse asnjë markë tjetër automobilistike në botë nuk e përfaqëson konceptin “Made in Germany” aq shumë sa Mercedes-Benz. Megjithatë, edhe prodhuesi i njohur i makinave nga Shtutgarti duket se po shqyrton mundësinë e mbylljes së fabrikave. Në mes të mosmarrëveshjeve për kostot e larta të punës, Mercedes po rrit presionin ndaj këshillit të punëtorëve dhe sindikatës IG Metall. Bordi drejtues ka vendosur të pezullojë për momentin të gjitha investimet e mëtejshme në fabrikat e saj në Gjermani. Siç shpjegon drejtoresha e Burimeve Njerëzore të Mercedes-Benz, Britta Seeger, në një intervistë për rrjetin e brendshëm të kompanisë: “Tashmë jemi të detyruar të shqyrtojmë në mënyrë konkrete dhe të detajuar se cilat fabrika në Gjermani mund të vazhdojmë t'i mbajmë në funksion”. Edhe pse, sipas saj, “kompania dëshiron të shmangë mbylljen e fabrikave me çdo kusht, për fat të keq, tashmë duhet ta shqyrtojmë këtë mundësi shumë më seriozisht”. Njoftimi vjen vetëm pak muaj, pasi gjiganti tjetër i industrisë gjermane të automobilave, Volkswagen, njoftoi mbylljen e fabrikave dhe shkurtime të konsiderueshme të vendeve të punës.Sipas një artikulli të gazetës Bild, Mercedes i konsideron fabrikat e saj në Gjermani tepër të shtrenjta për t'u operuar. Sipas të dhënave të kompanisë, një orë pune në sektorin e prodhimit në disa raste kushton deri në pesë herë më shumë se në Evropën Lindore. Për këtë arsye, bordi drejtues kërkon, ndër të tjera, zgjatjen e orarit të punës pa kompensim shtesë në pagë. Gjithashtu, në listën e shkurtimeve janë përfshirë edhe pagesat e veçanta, si pjesëmarrja në fitimet e kompanisë, shpërblimi për pushimet verore dhe bonusi i Krishtlindjeve. Michael Schiebe, drejtuesi përgjegjës për prodhimin në Mercedes, kishte paralajmëruar më herët se dy fabrika në Gjermani mund të mbyllen nëse nuk ulen kostot.