Dhunoi brutalisht të dashurën, e kërcënonte me vdekje dhe e la me dëmtime në tru, gangsteri “Mr Big” dënohet me gati 5 vite burg

John Gizzi, i njohur në botën e krimit me nofkën “Mr Big”, u dënua me 4 vite e 11 muaj burg nga Gjykata e Kurorës në Mold, pasi pranoi akuzat për sjellje kontrolluese dhe detyruese ndaj Natasha Farah, si dhe për mbytjen me duar të motrës së saj, Samantha Farah.

Sipas dosjes gjyqësore, Gizzi kishte ushtruar një fushatë të vazhdueshme dhune dhe poshtërimi ndaj partneres së tij. Ai përpiqej të kontrollonte veshjet që ajo mbante, e fyente vazhdimisht dhe e sulmonte fizikisht në vende të ndryshme publike.

Mes episodeve të dhunës përmenden një grushtim në një parking, një sulm në një palestër të frekuentuar dhe hedhja e një peshe të rëndë palestre drejt saj. Abuzimi i vazhdueshëm ndikoi rëndë në gjendjen e Natashës, e cila përfundimisht tentoi vetëvrasjen dhe pësoi dëmtime të rënda në tru. Ajo, nënë e një fëmije, ka mbetur me pasoja katastrofike shëndetësore.

Dhuna e Gizzi-t nuk u kufizua vetëm ndaj partneres së tij. Kur Samantha Farah ndërhyri për të mbrojtur motrën, ai e kapi nga fyti dhe e shtrëngoi në një pub. Më vonë, sipas dëshmisë në gjykatë, ai e përplasi me automjetin e tij fuoristradë dhe e kërcënoi se do ta “fuste në një gropë”, ndërsa ajo përpiqej të mbronte Natashën.

Gizzi pranoi se kishte ushtruar sjellje kontrolluese dhe detyruese ndaj Natasha Farah gjatë periudhës 1 mars 2025 deri më 8 prill 2026. Ai pranoi gjithashtu se nuk kishte dhënë kodin PIN të një telefoni celular kur ia kërkoi policia, më 27 prill 2026, si dhe akuzën për mbytjen me duar të Samantha Farah më 3 prill.

Gjatë seancës, gjykatësi Simon Mills e cilësoi çështjen si një nga rastet më të rënda të sjelljes kontrolluese në kontekstin e dhunës në familje.

“Ky është një nga rastet më të rënda të kontrollit detyrues në kontekstin e dhunës në familje që mund të imagjinohet”, deklaroi gjykatësi.

Ai theksoi se Gizzi përdorte vazhdimisht gjuhë mizogjene dhe seksiste ndaj Natashës.

“Ju përdornit ndaj saj, në mënyrë të shpeshtë, një gjuhë të tmerrshme, mizogjene dhe seksiste. Një gjuhë e tillë është serioze, sepse është pjesë e procesit të poshtërimit dhe nënçmimit të një personi, duke shkatërruar ndjenjën e tij të vetëvlerësimit”, u shpreh Mills.

Gjykatësi shtoi se nuk mund ta dënonte Gizzi-n për gjendjen aktuale shëndetësore të Natashës, por paralajmëroi se nëse dalin prova të tjera, policia mund të nisë një hetim të ri.

Nëna e viktimës, Denise, mbajti një deklaratë prekëse në gjykatë, ku e përshkroi Gizzi-n si një “përbindësh djallëzor që buzëqesh” dhe i kërkoi gjykatësit ta përdorte këtë çështje si shembull.

“Vajza ime ka mbetur me dëmtime në tru për shkak të këtij njeriu, për shkak të këtij përbindëshi, i cili sot nuk do të qëndrojë para nesh. Efekti emocional shkatërrues që kjo ka pasur tek unë është diçka që mund të krahasohet vetëm me makthet më të tmerrshme. Jetët tona të çmuara nuk do të jenë më kurrë, kurrë të njëjtat”, deklaroi ajo.

Edhe Samantha Farah foli për gjendjen e motrës së saj, duke përshkruar vuajtjet e përditshme dhe pamundësinë e saj për të komunikuar.

“Ajo është e burgosur brenda trupit të saj. Ajo derdh lot të vërtetë, por nuk mund të nxjerrë kurrë një tingull dhe askush nuk mund ta kuptojë këtë, përveç familjes së saj. Nuk ka asnjë dënim që mund të na kthejë jetën që kishim, të më kthejë motrën time dhe jetën që duhej të ndanim me të”, tha Samantha.

Gjykata mësoi se Gizzi kishte sulmuar Natashën edhe në ditë të veçanta, përfshirë Shën Valentinin, Ditën pas Krishtlindjes dhe Ditën e Nënës. Si pasojë e dhunës, këto data, që normalisht duhet të ishin momente të bukura familjare, nuk i kanë lënë asnjë kujtim të lumtur.

Në mesazhet e tij, Gizzi kishte përdorur edhe kërcënime të rënda, duke i thënë Natashës që “t’u bënte të gjithëve një nder” duke i dhënë fund jetës. Në një tjetër mesazh e kishte kërcënuar: “Do të të jap fund, dreqi e marrtë”.

Përveç dënimit me burg, gjykata vendosi ndaj tij edhe urdhra ndalimi dhe masa mbrojtjeje nga dhuna në familje, me një kohëzgjatje prej 15 vitesh. John Gizzi është një emër i njohur për autoritetet në Uells, ku ka një histori të gjatë dënimesh penale. Në vitin 2006, ai u dënua me pesë vite e gjysmë burg pasi kishte rrahur dy persona të pastrehë me shkopinj druri. Ai u lirua pas tre vitesh vuajtje dënimi.

Në vitin 2011, u dënua me 11 vite burg pasi pranoi përfshirjen në një komplot për futjen e kokainës në Uells. Pas lirimit, Gizzi u vendos në një vilë të madhe në St Asaph, në Uellsin e Veriut. Ai zotëronte prona me vlerë rreth 1.75 milionë paund pranë katedrales së qytetit, drejtonte një Bentley me vlerë rreth 100 mijë paund dhe shfaqej shpesh me një orë luksoze Rolex. Megjithatë, tashmë ai do të duhet të vuajë një tjetër dënim me burg, këtë herë për dhunën dhe abuzimin ndaj Natasha Farah dhe sulmin ndaj motrës së saj.

Top Channel