Pas dorëheqjes së Jensen Huag, Nvidia kërkon drejtuesin e ri, emrat në listën e pasuesve të mundshëm

Nvidia po përballet me një skenar që deri pak kohë më parë dukej i vështirë për t’u imagjinuar: e ardhmja e kompanisë pa Jensen Huang në krye.

Pas dorëheqjes së bashkëthemeluesit dhe drejtuesit historik, e cila erdhi pas raportimeve për marrëdhënie jashtëmartesore dhe pretendimeve që lidhen me çështje të sigurisë kombëtare, përgjegjësinë për drejtimin e përkohshëm të gjigantit amerikan të çipave e ka marrë drejtoresha financiare, Colette Kress.

Tashmë, një prej sfidave më të mëdha për kompaninë është gjetja e pasuesit të përhershëm të Huang, i cili për më shumë se tri dekada ndërtoi një biznes që sot renditet ndër kompanitë më të vlefshme në botë.

Por kush është Colette Kress dhe cilët janë emrat që mund të marrin drejtimin e Nvidia-s?

Colette Kress, gruaja që mban aktualisht frenat e Nvidia-s. Ajo është një profesioniste me më shumë se 30 vite përvojë në industrinë e teknologjisë dhe financave. Përpara se t’i bashkohej Nvidia-s, ajo mbajti pozicione të rëndësishme drejtuese në kompani të njohura si Cisco dhe Microsoft.

Në Nvidia, Kress mban postin e drejtoreshës financiare dhe zëvendëspresidentes ekzekutive. Ajo ka qenë dëshmitare e transformimit të kompanisë, nga një prodhues procesorësh grafikë për videolojëra në fillim të viteve 1990, në një prej aktorëve kryesorë të industrisë globale të inteligjencës artificiale.

Kress ka qenë gjithashtu një nga figurat më të rëndësishme në komunikimin financiar të kompanisë, duke marrë pjesë në çdo prezantim të rezultateve financiare së bashku me Huang.

Bashkëthemeluesi dhe inxhinieri, kandidatët e brendshëm

Një prej emrave që përmendet si kandidat i mundshëm është Chris Malachowsky, bashkëthemelues i Nvidia-s së bashku me Jensen Huang dhe Curtis Priem.

Malachowsky është një nga figurat më të vjetra drejtuese të kompanisë dhe ka luajtur rol të rëndësishëm në zhvillimin e teknologjisë kompjuterike që qëndron në themel të produkteve të Nvidia-s. Një tjetër emër është Ian Buck, drejtuesi përgjegjës për biznesin e informatikës me performancë të lartë të kompanisë.

Buck ishte ndër pionierët e hershëm që ndihmuan në zgjerimin e përdorimit të procesorëve grafikë përtej industrisë së videolojërave, duke kontribuar në aplikimet e tyre në informatikë dhe inteligjencë artificiale.

Charu Chanana, strateg investimesh në bankën Saxo, vlerëson se Buck mund të ndihmojë në ruajtjen e avantazhit teknologjik të Nvidia-s, por shton se aftësia e tij për të menaxhuar marrëdhëniet e gjera tregtare dhe sfidat gjeopolitike do të ishte nën vëzhgim.

Ndërkohë, edhe fëmijët e Jensen Huang punojnë në pozicione drejtuese në Nvidia, por mosha dhe përvoja e tyre relativisht e kufizuar i bëjnë më pak të mundshëm si kandidatë për drejtimin e menjëhershëm të kompanisë.

Tim Cook dhe Rene Haas, emrat nga jashtë Nvidia-s

Nëse Nvidia vendos të kërkojë një drejtues jashtë strukturave të saj, në diskutimet e analistëve janë përmendur edhe emra të njohur të industrisë së teknologjisë. Njëri prej tyre është Tim Cook, ish-drejtori ekzekutiv i Apple, i cili aktualisht mban postin e kryetarit të bordit të kompanisë.

Jun Bei Liu, themeluese dhe menaxhere portofoli në Ten Cap, e konsideron Cook një emër të mundshëm për shkak të përvojës së tij në menaxhimin e zinxhirëve globalë të furnizimit. Megjithatë, ajo vë në pikëpyetje nëse Cook do të ishte i gatshëm të largohej nga Apple për të marrë drejtimin e Nvidia-s.

Një tjetër kandidat i përmendur është Rene Haas, drejtori ekzekutiv i Arm Holdings, kompanisë britanike të projektimit të gjysmëpërçuesve. Ai ka përvojë në drejtimin e një kompanie të listuar në bursë dhe njohuri të thella në industrinë e çipave.

Sipas Charu Chanana, ai do të sillte përvojën e nevojshme në sektorin e gjysmëpërçuesve, megjithëse modeli i biznesit të Nvidia-s ndryshon ndjeshëm nga ai i Arm.

Për Nvidia-n, zgjedhja e drejtuesit të ri nuk është thjesht një çështje organizative. Kompania duhet të gjejë një figurë që të kombinojë njohuritë teknike, vizionin strategjik dhe marrëdhëniet e ndërtuara me partnerët kryesorë të industrisë globale të teknologjisë.

Ndërkohë pas njoftimit për largimin e Huang, aksionet e Nvidia-s pësuan një rënie të fortë në bursën e Nju Jorkut. Sipas raportimit, në hapje të tregut aksionet ranë me më shumë se 13%, duke fshirë mbi 500 miliardë dollarë nga vlera e tregut të kompanisë.

Edhe disa prej institucioneve të mëdha të investimeve rishikuan në ulje parashikimet e tyre për aksionet e gjigantit amerikan.

Për Nvidia-n, periudha e ardhshme do të jetë vendimtare. Kompania duhet jo vetëm të sigurojë vazhdimësinë e drejtimit, por edhe të bindë investitorët dhe partnerët se mund të ruajë pozicionin e saj dominues në tregun e inteligjencës artificiale edhe pa njeriun që e ndërtoi dhe e udhëhoqi për më shumë se 30 vjet.

Top Channel