Bordi i Transparencës ka vendosur çmimet e reja të shitjes me shumicë dhe pakicë të karburanteve në vend. Vendimi është marrë në mbledhjen e zhvilluar këtë të enjte, më 12 nëntor 2026, në kuadër të masave për kufizimin e përkohshëm të çmimeve në tregun e hidrokarbureve.

Sipas vendimit të Bordit, nafta (gazoili) do të tregtohet me jo më shumë se 210 lekë për litër në pikat e shitjes me pakicë, ndërsa çmimi i shitjes me shumicë nuk do të kalojë 198 lekë për litër.

Për benzinën, çmimi maksimal në pakicë është përcaktuar në 165 lekë për litër, ndërsa në shumicë në 153 lekë për litër.

Ndërkohë, gazi për automjetet do të shitet me 71 lekë për litër në pakicë dhe 59 lekë për litër në shumicë. Çmimi i gazoilit për sektorin e peshkimit është përcaktuar në 114 lekë për litër.

Çmimet e reja hyjnë në fuqi sot, më 12 nëntor, në orën 18:30, dhe do të mbeten të vlefshme deri në mbledhjen e ardhshme të Bordit të Transparencës.

Bordi u ka tërhequr vëmendjen të gjithë operatorëve të tregtimit me shumicë dhe pakicë për zbatimin e detyrueshëm të vendimit, duke paralajmëruar se në rast konstatimi të shkeljeve do të vendoset pezullimi i aktivitetit.

Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë bëjnë me dije se janë angazhuar për mbrojtjen e interesave të konsumatorëve shqiptarë dhe garantimin e konkurrencës së ndershme në treg.