Martin Zubimendi po kalon një periudhë të pazakontë te Arsenali, pasi ende nuk ka arritur të sigurojë një vend në formacionin titullar në Ligën Premier këtë sezon.
Mesfushori spanjoll, i cili sezonin e kaluar ishte një prej lojtarëve më të rëndësishëm të skuadrës, ka regjistruar vetëm 100 minuta në kampionat, të gjitha në shtatë paraqitje si zëvendësues, në dhjetë ndeshjet e para.
Vetë Zubimendi ka pranuar se lodhja fizike mund të ketë ndikuar në këtë situatë.
“Kam luajtur një numër të jashtëzakonshëm minutash dhe, të jem i sinqertë, isha i lodhur. Kishte edhe faktorë të tjerë, por aspekti fizik sigurisht që mund të ketë qenë njëri prej tyre”, deklaroi ai për Marca.
Ndërkohë, konkurrenca në mesfushën e Arsenalit është shtuar, ndërsa Myles Lewis-Skelly ka shfaqur formë të mirë. Sipas raportimit, Bruno Guimaraes, i transferuar nga Newcastle për 86 milionë euro, duket se është bërë zgjedhja e preferuar e Mikel Artetas përkrah Declan Rice dhe Martin Odegaard.
Pavarësisht minutave të pakta, Zubimendi ka hedhur poshtë mundësinë e largimit nga Arsenali, ndërsa burime pranë Atletico Madridit kanë minimizuar mundësinë e një transferimi gjatë afatit kalimtar të janarit.
Trajneri Mikel Arteta, nga ana tjetër, ka insistuar se spanjolli vazhdon të jetë shumë i rëndësishëm për skuadrën.
“Ai është një lojtar shumë i rëndësishëm për ne. Energjia, përkushtimi dhe dëshira e tij për të ndihmuar skuadrën janë të padiskutueshme”, ka deklaruar Arteta.
Një ftesë nga kombëtarja e Spanjës për ndeshjet ndaj Çekisë dhe Anglisë mund t'i ndihmojë mesfushorit që të rikthejë ritmin e tij.
Sezonin e kaluar, Zubimendi ishte një prej shtyllave të Arsenalit, duke startuar në 34 nga 38 ndeshjet e Ligës Premier dhe duke regjistruar më shumë se 3.000 minuta lojë. Në mesin e futbollistëve të skuadrës, vetëm Declan Rice kishte më shumë minuta në fushë./Telegrafi/
