Shkencëtarët kanë ngritur alarmin për pasojat e mundshme të fenomenit klimatik Super El Niño, i cili pritet të sjellë temperatura ekstreme në disa rajone të botës gjatë muajve në vijim. Sipas vlerësimeve të studiuesve, nxehtësia e shkaktuar nga ky fenomen mund të lidhet me rreth 451 mijë vdekje shtesë, pa përfshirë viktimat e mundshme nga përhapja e sëmundjeve infektive, të cilat mund të favorizohen nga temperaturat e larta.

Colin J. Carlson, epidemiolog i shëndetit planetar në Shkollën e Shëndetit Publik të Universitetit Yale, i ka bërë thirrje Organizatës Botërore të Shëndetësisë (OBSH) që ta shpallë fenomenin një emergjencë të shëndetit publik me shqetësim ndërkombëtar. Së bashku me kolegun Christopher Callahan, profesor asistent në Shkollën O’Neill të Çështjeve Publike dhe Mjedisore të Universitetit të Indianës, Carlson argumenton se pasojat e mundshme të një Super El Niño mund të jenë të krahasueshme me ato të krizave të mëdha shëndetësore.

Dy studiuesit paralajmërojnë se qindra mijëra njerëz mund të rrezikohen, veçanërisht në rajonet më të ekspozuara ndaj valëve të të nxehtit. Në mbështetje të shqetësimeve të tyre, ata referojnë të dhënat e Laboratorit të Ndikimit të Klimës në Universitetin e Çikagos, i cili vlerëson se vdekjet e lidhura me temperaturat ekstreme mund të arrijnë në rreth 451 mijë. Sipas tyre, ky bilanc nuk përfshin ndikimin e mundshëm të sëmundjeve infektive, përhapja e të cilave mund të përshpejtohet nga ndryshimet e temperaturave dhe kushtet klimatike.
Cilat vende rrezikojnë më shumë?
Sipas parashikimeve të cituara nga studiuesit, disa prej vendeve më të prekura pritet të jenë në Afrikë dhe Azi.

Në Nigeri vlerësohen rreth 31,400 vdekje shtesë, ndërsa në Sudan rreth 17,500. Në Filipine, Vietnam, Tajlandë dhe Kamboxhia parashikohen gjithsej 19,400 vdekje shtesë, ndërsa në Indonezi rreth 19,300. Edhe India pritet të përballet me pasoja të rënda, me një vlerësim prej 15,800 vdekjesh shtesë. Në Amerikën e Jugut, Brazili konsiderohet ndër vendet më të ekspozuara, me rreth 13,300 viktima shtesë të parashikuara.

Shkencëtarët thonë se shenjat e para të një Super El Niño kanë nisur të shfaqen, ndërsa temperaturat e oqeanit parashikohet të arrijnë nivele shumë të larta gjatë muajve nëntor dhe dhjetor.
Thatësira dhe përmbytje, paralajmërimi për ndryshime ekstreme të motit
Meteorologu i lartë i MyRadar, Matthew Capucci, paralajmëron se Super El Niño mund të krijojë kushte shumë të ndryshme në rajone të ndryshme të planetit. Sipas tij, ndikimi do të jetë veçanërisht i ndjeshëm në zonat e lidhura me Oqeanin Paqësor, ndërsa vendet që ndikohen më shumë nga Oqeani Atlantik mund të përjetojnë një ulje të aktivitetit të uraganeve.

Për pjesën tjetër të botës, priten luhatje më të forta mes periudhave të thatësirës dhe reshjeve intensive, duke rritur rrezikun e përmbytjeve dhe dëmeve materiale. Capucci thekson se një prej problemeve kryesore është fakti që infrastruktura e shumë vendeve është ndërtuar duke marrë si bazë kushtet normale të motit dhe jo ngjarjet ekstreme klimatike. Për këtë arsye, kur shfaqen fenomene me intensitet të pazakontë, pasojat mund të jenë shumë më të mëdha, veçanërisht për komunitetet që nuk kanë kapacitetet e nevojshme për t’u përshtatur. Studiuesit paralajmërojnë se sfida kryesore në muajt e ardhshëm do të jetë mbrojtja e popullsisë në zonat më të rrezikuara, ndërsa pasojat e mundshme të Super El Niños mbeten një shqetësim serioz për shëndetin publik dhe sigurinë klimatike.