Autoritetet egjiptiane kanë përfshirë 35 organizata dhe 36 individë në listën e subjekteve terroriste dhe personave të shpallur terroristë, me një afat prej pesë vitesh. Në mesin e organizatave të përfshira në vendim figuron edhe Fondacioni Kulturor për Shkencë dhe Arsim nga Kosova.
Vendimi është marrë nga Gjykata Penale e Kajros, në kuadër të çështjes nr. 11108 të vitit 2026, e regjistruar pranë Prokurorisë së Sigurisë së Lartë të Shtetit. Ai është publikuar më 10 nëntor 2026, në numrin 250 (suplement) të Gazetës Zyrtare të Egjiptit.
Përfshirja në këtë listë parashikon që organizatat dhe individët e identifikuar të mbeten nën këtë përcaktim për një periudhë pesëvjeçare.
Përveç fondacionit nga Kosova, në listën e publikuar përfshihen edhe disa organizata dhe institucione të tjera evropiane. Mes tyre janë Këshilli i Myslimanëve të Evropës dhe degët e tij, Fondacioni Mysliman i Francës, Shoqata Islame e Britanisë, Lidhja Myslimane e Zvicrës, Komuniteti Islamik Gjerman dhe Këshilli i Myslimanëve të Ukrainës.
Vendimi përfshin gjithashtu organizata dhe institucione nga Shqipëria, Turqia, Italia, Spanja, Irlanda, Polonia, Rumania, Hungaria, Belgjika, Bosnja dhe Hercegovina, Maqedonia e Veriut, Finlanda, Norvegjia, Danimarka, Austria, Holanda, Moldavia dhe Greqia.
Në mesin e subjekteve të tjera të përfshira në listë janë edhe Këshilli Evropian për Fetva dhe Hulumtime, Këshilli Evropian i Imamëve, Këshilli Evropian për Familjen Myslimane, Këshilli Evropian për Kur’anin e Shenjtë dhe Forumi Evropian i Studentëve Myslimanë.
Në listën e zezë edhe 36 individë
Përveç 35 organizatave, vendimi i Gjykatës Penale të Kajros përfshin edhe 36 individë, emrat e të cilëve janë publikuar në Gazetën Zyrtare.
Mes personave të listuar janë Abdullah Sami bin Mansour, Ibrahim Farouk Mohamed Al-Zayyat, Ahmed Kazem Fathi Suleiman Al-Rawi, Anas Osama Tawfiq A-Tikriti, Mohamed Heni dhe Wissam Al-Bardawil, si dhe persona të tjerë.
Vendimi i autoriteteve egjiptiane përfshin kështu një numër organizatash dhe individësh nga vende të ndryshme, ndërsa përfshirja e fondacionit me bazë në Kosovë e bën çështjen me interes të veçantë për opinionin publik në rajon.