John Stones mund të largohet nga Interi, vetëm katër muaj pasi iu bashkua klubit italian si transferim i lirë nga Manchester City.

Pas një dekade të jashtëzakonshme në “Etihad Stadium”, ku fitoi gjashtë tituj të Ligës Premier, tre FA Cup dhe një Ligë të Kampionëve, largimi emocional i Stones nga Manchester City u konfirmua në fillim të këtij viti.

Mbrojtësi anglez zhvilloi 295 paraqitje me “Qytetarët”, duke u shndërruar në kulmin e karrierës së tij në njërin prej mbrojtësve më të mirë në Evropë për ndërtimin e lojës nga prapavija. Megjithatë, tani në moshën 32-vjeçare, ish-futbollisti i Evertonit po kalon një periudhë të vështirë, ndërsa problemet e vazhdueshme me lëndimet e kanë ndjekur edhe në Itali.

Stones kishte marrë oferta të shumta në momentin kur i përfundoi kontrata me Manchester Cityn. Arsenali dhe Chelsea ishin ndër klubet që shfaqën interesim për mbrojtësin, por pa paraqitur ofertë zyrtare. Më pas, në garë u përfshi edhe Juventusi, i cili shqyrtoi mundësinë e transferimit të tij, përpara se Interi t’i ofronte një kontratë dyvjeçare.

I transferuar te “Nerazzurrët”, ku iu bashkua edhe mesfushorit të Liverpoolit, Curtis Jones, Stones pritej të sillte cilësi dhe përvojë në mbrojtjen e Interit. Megjithatë, problemet fizike e kanë penguar atë të tregojë potencialin e tij në Serie A.

Numri gjashtë i Interit është jashtë fushave që nga mesi i shtatorit, për shkak të një lëndimi në kofshë, të cilin e pësoi pasi luajti vetëm 62 minuta në fitoren 5-3 ndaj Udineses.

Kjo është vetëm njëra nga katër paraqitjet e tij në të gjitha garat, ndërsa raportimet nga Italia bëjnë të ditur se e ardhmja e tij në “San Siro” varet nga aftësia për të qëndruar i gatshëm fizikisht.

Interi pëson një tjetër goditje të fortë, i lëndohet edhe një lojtar dhe do të mungojë së paku katër javë

Sipas Gazzetta dello Sport, 32-vjeçari mund të largohet gjatë afatit kalimtar të janarit, ose të mos përfshihet në listën e përditësuar të skuadrës nëse nuk arrin të përmirësojë disponueshmërinë e tij.

Kjo situatë mund të çojë edhe në një skenar të pafavorshëm për Stonesin, me mundësinë që Interi t’ia ndërpresë kontratën para kohe.

Raportimi nuk përmend se ku mund të vazhdojë karrierën anglezi në rast të largimit nga Interi, por një rikthim në Ligën Premier mbetet një mundësi./Telegrafi/

Ndërkombëtare Futboll Sport Ekipet Inter