Debate në komisionin  për Ekonominë, Punësimin dhe Financat për dy TEC-et lundruese “Tigri 1” dhe “Tigri 3”, të ankoruara në Vlorë.

Deputeti i PD-së, Eno Bozdo, akuzoi qeverinë se po shpenzon miliona euro për mirëmbajtjen e dy anijeve 30-vjeçare, të cilat, sipas tij, vetëm ndotin dhe rëndojnë taksapaguesit. Ministri i Infrastrukturës, Enea Karakaçi, kundërshtoi akuzat, duke deklaruar se TEC-et kanë prodhuar energji dhe se nga shitja e saj janë fituar 31.5 milionë euro.

Në mbledhjen e sotme, Karakaçi prezantoi edhe projektbuxhetin e Ministrisë së Infrastrukturës dhe Energjisë për vitin 2027, i cili parashikohet të jetë 75.45 miliardë lekë. Nga kjo shumë, 68 miliardë lekë do të shkojnë për investime kapitale dhe 7.4 miliardë lekë për shpenzime korrente.

Sipas ministrit, 76% e financimit për vitin 2027 do të jetë i brendshëm dhe 24% i huaj. Ndër projektet kryesore që do të mbështeten janë Korridori 8 dhe Korridori Blu, si dhe investimet për mirëmbajtjen dhe sigurinë rrugore.

Debati i plotë në komision:

Bozdo: Tigri 1 dhe Tigri 3 vazhdojnë të rëndojnë taksapaguesit pa ofruar asgjë në këmbim. Ju fshini kontratat në emër të sekretit tregtar. Janë me qira apo të shitura? Janë rrangalla 30-vjeçare që vetëm ndotin. Keni mbyllur tenderin 20 milionë euro për mirëmbajtjen e ca rrangallave atje.

Karakaçi: Në 2026-ën, deri në fund të gushtit, kur kam shifrat, kanë prodhuar 121 mijë mega. Të diskutoni që kjo sasi prodhimi mjafton për një ditë apo një javë është interpretim keqdashës.

Bozdo: Pse keqdashës?

Karakaçi: Po ua jap shpjegimin.

Bozdo: Mos thoni keqdashës!

Karakaçi: Me kapacitet të instaluar 100 mega, nuk është qëllimi të furnizohet Shqipëria. Është kapacitet rezervë dhe i domosdoshëm. Çmimet sot janë 300 euro për mega për energjinë në këtë periudhë. Ato janë asete shtesë prodhimi kur çmimet e tregut janë të larta. 31.5 milionë euro kemi fituar deri më tani nga këto anije lundruese, nga shitja e energjisë së prodhuar.

Bozdo: Asnjë në botë nuk i pranon ato.

Karakaçi: Ka vende në botë sa të duash. Janë në pronësi të KESH dhe janë licencuar para dy ditësh edhe nga ERE. Janë asete të KESH. Ato shërbejnë në kohë të tilla kur çmimi i energjisë në bursë është mbi 300 euro dhe kështu do të vijojë përgjatë gjithë muajit.

Lajm në përditësim....

Rendit zhvillimet sipas orarit:
Ora 16:14
Bozdo: Pse nuk vihet në punë Termocentrali i Vlorës! Karakaçi: Po bëhet studimi nga kompania Aktor, e sjell gazin nga Amerika

1794410400_eneakarakai.JPG

Ministri i Infrastrukturës dhe Energjisë, Enea Karakaçi, tha se kompania Aktor po studion mundësinë e vënies në punë të Termocentralit të Vlorës me gaz nga Shtetet e Bashkuara. Në përgjigje të deputetit demokrat Eno Bozdo, i cili kërkoi të dijë pse TEC-i mbetet jashtë funksionit, Karakaçi tha se projekti parashikon lidhjen me gazsjellësin TAP dhe një kapacitet prej 340–400 megavatësh. Ministri tha se po bëhet studimi i fizibilitetit dhe nëse rezulton i suksesshëm, projekti do të dërgohet në Kuvend për miratim.

Bozdo: Të vihet në punë TEC i Vlorës, të riparohet defekti. Kemi nevojë energji bazë, ku jemi sot? Nuk e di nëse vihet më në punë TEC i Vlorës? Ju keni bërë një marrëveshje me kompaninë AKTOR për të blerë gaz, por ne kemi TAP-in, nuk marrim fare gaz?

Karakaçi: Ky TEC, i ndërtuar në vitin 2008, i parashikuar për tu vënë në punë me naftë, si anijet lundruese që ju i kritikoni aq shumë. Tec-i është jofunksional, ishte i keq investuar. Kemi bërë një marrëveshje me TAP për të bërë pikë dalje në Fier dhe ka avancim në këtë punim. Patëm një tentativë ta vinim në punë me EXELERATE POWER, nuk u arrit të finalizohej.

Është bërë një marrëveshje në qershor me AKTOR, si rrjedhojë e një kompania amerikane që do të sillte gaz përmes kompanisë Aktor në Evropë. Projekti është i ngjashëm për ta vënë në punë TEC- për at kthyer me kapacitet 340-400 mega dhe për ta ndërlidhur me TAP, po bëhet fizibiliteti, nëse do jetë e suksesshme, do vijë në kuvend për miratim.

Termocentrali, ndërtimi i të cilit nisi në vitin 2008 dhe përfundoi në 2012-ën, nuk ka prodhuar asnjë ditë energji me disa prova të dështuara, pas një defekti teknik në sistemin e ftohjes. TEC-i i Vlorës konsiderohet një mundësi alternative për të garantuar furnizim e vendit me energji në kushte emergjente.

SI.E./Shqiptarja.com