Robert Fico e cilësoi shantazh qëndrimin e Berlinit, pasi kancelari gjerman Friedrich Merz paralajmëroi se mund të pengojë miratimin e buxhetit shtatëvjeçar të Bashkimit Europian, nëse shtetet anëtare nuk bien dakord për financimin e Ukrainës.
Kërkesën e Merzit e kundërshtoi edhe kryeministri çek Andrej Babiš. Kancelari gjerman kërkon që kjo çështje të trajtohet në samitin e liderëve europianë në Dublin, duke vënë në dukje se ndihmën për Kievin po e përballon kryesisht një grup i kufizuar vendesh anëtare.
Të lidhura
None found
BE-ja ka miratuar më parë një hua prej 90 miliardë eurosh për të mbuluar nevojat ushtarake dhe civile të Ukrainës gjatë viteve 2026-2027. Ndërkohë, intensifikimi i sulmeve ruse ka shtuar ndjeshëm shpenzimet e luftës.
Presidenti ukrainas Volodymyr Zelensky ka kërkuar edhe 70 miliardë euro për të përballuar deficitin buxhetor. Nga kjo shumë, Bashkimi Europian është zotuar të sigurojë 45 miliardë euro. Hungaria, Sllovakia, Çekia dhe Bullgaria nuk pranojnë të marrin pjesë në raundin e ardhshëm të financimit.
Si kontribuuesja më e madhe neto në buxhetin europian, Gjermania kërkon që të gjitha vendet anëtare të kontribuojnë financiarisht për Ukrainën përpara arritjes së një marrëveshjeje për buxhetin e BE-së për vitet 2028-2034.
