Dy persona janë arrestuar të mërkurën në Prishtinë, nën dyshimin për përfshirje në veprën penale “Mashtrimi lidhur me pranimin e fondeve nga komuniteti ndërkombëtar”.
Sipas njoftimit të Policisë së Kosovës, të dyshuarit, H.L. dhe T.M., meshkuj kosovarë, në cilësinë e drejtorit dhe menaxherit të një kompanie, dyshohet se kanë përfituar dy grante në vlerë të përgjithshme prej 575 mijë e 736 eurosh.
Granti i parë, në vlerë prej 293 mijë e 500 eurosh, dyshohet se është keqpërdorur në shumën prej 23 mijë eurosh, duke raportuar në mënyrë të rrejshme se shpenzimet për blerjen e makinerive ishin realizuar në tërësi.
Ndërkaq, nga granti i dytë, në vlerë prej 282 mijë e 236 eurosh, dyshohet se janë keqpërdorur 39 mijë e 902 euro, përmes raportimit të rrejshëm për realizimin e plotë të shpenzimeve për blerjen e makinerive.
Policia ka bërë të ditur se gjatë procesit hetimor është vërtetuar se të dyshuarit kanë keqpërdorur gjithsej 62 mijë e 902 euro nga këto dy grante.
“Të dyshuarit janë intervistuar në prezencën e avokateve të tyre mbrojtës dhe më pas, me urdhër të prokurorit të rastit, u është shqiptuar masa e ndalimit prej 48 orëve”, thuhet në njoftim.