Egjipti shpall organizata terroriste 35 subjekte në Evropë, në listë edhe një shoqatë në Shqipëri

Egjipti ka përfshirë 35 organizata, institucione dhe shoqata, si dhe 36 individë, në listat e organizatave terroriste dhe personave të shpallur terroristë, për një periudhë pesëvjeçare. Mes subjekteve të përfshira në vendim figuron edhe një shoqatë e regjistruar në Shqipëri, e emërtuar “E Ardhmja”.

Vendimi është marrë nga Gjykata Penale e Kajros, në zbatim të një procedure gjyqësore të regjistruar pranë Prokurorisë së Lartë për Sigurinë e Shtetit, me numër 11108 të vitit 2026.

Sipas agjencisë egjiptiane të lajmeve MENA, vendimi është publikuar në numrin 250, shtojcë, të Gazetës Zyrtare të Egjiptit, në kuadër të kërkesës nr. 1 të vitit 2026 për përfshirjen e organizatave dhe personave në listat përkatëse.

Në listën e 35 subjekteve të përfshira ndodhet Këshilli i Myslimanëve të Evropës dhe degët e tij, së bashku me një numër organizatash dhe institucionesh islame në vende të ndryshme evropiane.

Mes tyre përmenden Fondacioni “Myslimanët e Francës”, Shoqata Islamike e Britanisë, Liga Myslimane e Zvicrës, Bashkësia Islame Gjermane, shoqata islame në Suedi, Itali, Spanjë, Irlandë, Poloni, Rumani, Hungari dhe Finlandë, si dhe organizata të tjera në Austri, Holandë, Belgjikë, Danimarkë dhe Norvegji.

Në të njëjtën listë është përfshirë edhe Shoqata Kulturore “E Ardhmja”, e identifikuar në dokumentin e publikuar si subjekt nga Shqipëria. Gjithashtu, vendimi përfshin organizata të tjera nga Kosova, Bosnjë-Hercegovina, Maqedonia e Veriut, Ukraina, Rusia dhe Turqia.

Pjesë e listës janë edhe disa struktura me veprimtari në nivel evropian, mes tyre Këshilli Evropian për Fetva dhe Hulumtime, Këshilli Evropian i Imamëve, Këshilli Evropian për Familjen Myslimane, Këshilli Evropian për Kuranin e Shenjtë, Këshilli Evropian i Grave Myslimane dhe Forumi Evropian i Studentëve Myslimanë.

36 individë në listën e personave terroristë

Përveç organizatave, gjykata ka përfshirë në listën e personave të shpallur terroristë edhe 36 individë. Mes emrave të publikuar janë Anas Osama Tawfiq A-Tikriti, Ibrahim Farouk Mohamed Al-Zayyat, Ahmed Kazem Fathi Suleiman Al-Rawi, si dhe persona të tjerë me emra nga vende të ndryshme.

Lista përmban gjithashtu emrin e Abdel Aziz Mohamed Abdel Aziz Ibrahim, i njohur edhe si Hamza Korkmaz.

Gjykata ka urdhëruar publikimin e vendimit në Gazetën Zyrtare të Egjiptit, duke përcaktuar se përfshirja në listat përkatëse shoqërohet me pasojat ligjore që parashikon legjislacioni egjiptian.

Vendimi është shpallur në seancën e mbajtur më 10 nëntor 2026.

Në dokumentin e publikuar, përfshirja e Shoqatës Kulturore “E Ardhmja” identifikohet me Shqipërinë. Megjithatë, informacioni i publikuar nuk jep të dhëna të mëtejshme mbi aktivitetin e saj, vendndodhjen apo lidhjet e mundshme me organizata të tjera në vend.