Gjermania ndalon përdorimin e dronëve kinezë në bazat ushtarake për arsye sigurie

Gjermania ka ndaluar përdorimin e dronëve të prodhuar në Kinë, të disponueshëm komercialisht, në bazat e saj ushtarake dhe në terrenet e stërvitjes, duke përmendur arsye sigurie, sipas raportimeve.

Ushtritë perëndimore po shprehin gjithnjë e më shumë shqetësime se teknologjia e prodhuar në Kinë mund të përbëjë një kërcënim për sigurinë dhe të përdoret nga Pekini për të mbledhur informacione të ndjeshme.

Ndalimi në Gjermani, i cili hyn në fuqi menjëherë, vjen pas vendimit të ushtrisë amerikane për të ndaluar automjetet elektrike të kompanisë kineze BYD të hyjnë në Bazën Ajrore Kadena në ishullin japonez të Okinawa-s.

Cadena është baza ajrore më e madhe amerikane në Azinë Lindore dhe do të luante një rol të drejtpërdrejtë në rast të një krize që përfshin Kinën, Rusinë ose Korenë e Veriut.

Sipas një raporti të gazetës gjermane Der Spiegel, dronët, të cilët u ishin furnizuar njësive ushtarake vitet e fundit, po tërhiqen nga shërbimi sa më shpejt të jetë e mundur.

Komandantëve vendorë iu lejua të blinin këto dronë bazuar në një strategji të vitit 2024 , e cila përfshinte një “listë të bardhë” të sistemeve të miratuara.

Këtu përfshiheshin disa modele nga kompania kineze DJI, prodhuesi më i madh i dronëve në botë.

Meqenëse nuk ka një regjistër qendror për të regjistruar blerjet e bëra nga njësitë individuale ushtarake, ushtria është e detyruar të vendosë një ndalim të përgjithshëm , sipas Der Spiegel.