Deputeti i LDK-së, Avdullah Hoti, ka kundërshtuar deklaratat e kryeministrit Albin Kurti për uljen e pabarazisë në paga.
Hoti ka deklaruar se, pavarësisht pretendimeve të Kurtit, vetëm katër nga dhjetë persona në moshë pune janë të punësuar. Sipas tij, situata është edhe më e rëndë te gratë dhe të rinjtë.
Të lidhura
None found
Ai ka theksuar se këta tregues nuk kanë ndryshuar gjatë pesë viteve të fundit, megjithëse për skemat e punësimit dhe subvencionet janë shpenzuar miliona euro.
Ndër problemet e tjera të ngritura prej tij janë rritja e ndjeshme e kostos së jetesës, vështirësitë e prodhimit vendor dhe mungesa e sigurimeve shëndetësore.
“Për çfarë ulje të pabarazisë po flet ky?”, ka shkruar Hoti.
Ai ka renditur të dhënat që, sipas tij, tregojnë gjendjen reale:
Vetëm 4 nga 10 persona në moshë pune janë të punësuar.
Nga 10 gra të moshës së punës, vetëm 3 kanë një vend pune.
Ndër 10 të rinj të moshës 15-24 vjeç, vetëm 3 janë të punësuar.
Gjysma e popullsisë në moshë pune nuk është pjesë e tregut të punës.
Sipas Hotit, këto shifra kanë mbetur të pandryshuara në pesë vitet e fundit, pavarësisht miliona eurove të shpenzuara për skema punësimi dhe subvencione, të cilat nuk kanë sjellë rezultate reale afatgjata.
Ai ka pohuar gjithashtu se kostoja e jetesës është gati dyfishuar gjatë pesë viteve të fundit, ndërsa sigurimet shëndetësore ende nuk janë në horizont. Në të njëjtën kohë, prodhimi vendor ndodhet në krizë dhe çmimet e ushqimeve të importuara vijojnë të rriten.
“Atëherë për çfarë ulje të pabarazisë po flet ky?”, ka përfunduar Hoti.
