Një ushtarak i rangut të lartë i Ushtrisë Amerikane është arrestuar në Angli, nën dyshimin se ka ndihmuar shërbimet sekrete ruse, njoftuan të martën autoritetet britanike. Drejtori i FBI-së, Kash Patel, deklaroi se çështja lidhet me “akuza për spiunazh”.
Ushtaraku 41-vjeçar u arrestua nën dyshimin për shkelje të neneve 1 dhe 3 të Ligjit Britanik për Sigurinë Kombëtare, të cilat lidhen me sigurimin ose zbulimin e informacionit të mbrojtur dhe ndihmën ndaj një shërbimi të huaj inteligjence. Autoritetet britanike bënë të ditur se dyshimet lidhen me Rusinë, shkruan Ynet.
Sipas BBC-së, ushtaraku ishte vendosur në kampin Imjin, në Innsworth të Gloucestershire, ku ndodhet selia e Korpusit të Reagimit të Shpejtë të Aleatëve të NATO-s. Kontrollet u kryen në dy ambiente në këtë qark, rreth 140 kilometra në perëndim të Londrës.
Identiteti i të dyshuarit nuk është bërë publik dhe ai mund të mbahet në paraburgim deri në 14 ditë pa u ngritur ende një akuzë zyrtare.
Gjeneral brigade Sean Stinchon, komandant i Komandës së Kundërzbulimit të Ushtrisë Amerikane, deklaroi se sjellja e dyshuar e një ushtaraku të lartë, të cilit i ishte besuar informacion i ndjeshëm, është “një kujtesë se kërcënimet që vijnë nga brenda institucioneve janë reale dhe të vazhdueshme”.
Policia britanike theksoi se arrestimi nuk ka lidhje me asnjë hetim tjetër në vazhdim për terrorizëm. Ky sqarim erdhi disa orë pasi u bë e ditur se Shtetet e Bashkuara kishin larguar avionët ushtarakë të furnizimit me karburant nga baza ajrore RAF Mildenhall, në lindje të Anglisë, pas një kërcënimi iranian për t’i goditur ata.
Në shtator, Shtetet e Bashkuara kishin zhvendosur gjithashtu nga baza RAF Fairford në Britani bombarduesit që ishin përdorur në sulmet kundër Iranit. Edhe në atë rast, si arsye për zhvendosjen ishin përmendur shqetësimet e sigurisë që lidheshin me një kërcënim iranian.
Policia Metropolitane e Londrës bëri të ditur se oficerët e saj kundër terrorizmit bashkëpunuan ngushtë me FBI-në dhe ushtrinë amerikane për arrestimin dhe hetimin e zhvilluar të martën.
Patel e cilësoi arrestimin si “të rëndësishëm”, duke theksuar se dyshimet për spiunazh përbëjnë një shqetësim madhor për Shtetet e Bashkuara dhe aleatët e tyre.
“FBI-ja nuk toleron aspak persona që shkelin betimin e tyre ndaj Shteteve të Bashkuara dhe veprimet e të cilëve rrezikojnë sigurinë tonë kombëtare dhe atë të partnerëve tanë”, deklaroi ai.
Arrestimi vjen në një kohë kur shqetësimet për operacionet e dyshuara ruse të sabotimit dhe inteligjencës në të gjithë Evropën janë shtuar që nga nisja e pushtimit në shkallë të plotë të Ukrainës nga Moska, në shkurt të vitit 2022.
Zyrtarët perëndimorë ia kanë atribuar Rusisë rreth 200 incidente sabotimi dhe veprimtari të tjera armiqësore.
Këto incidente përfshijnë zjarrvënie në magazina, operacione me dronë, përpjekje për të vrarë kundërshtarë politikë jashtë vendit, vjedhje të teknologjisë së mbrojtjes dhe sulme kibernetike ndaj infrastrukturës kritike evropiane.
Një nga rastet e fundit lidhet me një operacion të dyshuar me dronë, që kishte në shënjestër aeroportin e Leipzigut në Gjermani, në muajin gusht. Autoritetet gjermane fajësuan zyrtarisht Moskën për këtë përpjekje dhe më pas urdhëruan mbylljen e një konsullate ruse.
