Sulmet e rinovuara me dronë të Ukrainës ndaj rafinerive ruse të naftës që prej fundit të tetorit kanë ulur me rreth 30% kapacitetin e përpunimit të naftës në Rusi, thanë dy burime nga industria, shkruan Reuters.
Sulmet ukrainase ndaj rafinerive ruse po i shtojnë vështirësitë e Moskës për të përballuar mungesat e karburantit në tregun vendas, ndërkohë që Rusia vijon të eksportojë naftë dizel në tregjet ndërkombëtare, në kuadër të një marrëveshjeje eksporti me presidentin amerikan Donald Trump.
Ukraina ka shtuar sulmet ndaj rafinerive ruse që prej fundit të tetorit, kur armëpushimi për sulmet ndaj objekteve energjetike, i shpallur nga Trump mes Kievit dhe Moskës, nuk arriti të zbatohej.
Sipas burimeve nga industria dhe zyrtarëve, sulmet ukrainase kanë ndërprerë operacionet dhe kanë shkaktuar situata emergjente në nëntë nga 35 rafineritë kryesore të Rusisë gjatë javës së fundit.
Sipas burimeve të industrisë, kapaciteti i kombinuar nominal ditor i rafinerive ruse të prekura nga sulmet me dronë që prej fundit të tetorit, përfshirë tri impiante të mëdha në Rusinë qendrore, arrin në rreth 300 mijë tonë metrikë, ose 2,2 milionë fuçi. Kjo shifër krahasohet me kapacitetin e përgjithshëm parësor të përpunimit të naftës në Rusi, prej rreth 930 mijë tonësh në ditë.
Në fund të tetorit, rafineritë ruse përpunonin rreth 700 mijë tonë, ose 5 milionë fuçi naftë bruto në ditë, sipas burimeve.
Burimet vlerësojnë se ulja reale e përpunimit të naftës bruto në rafineritë ruse mund të arrijë deri në 200 mijë tonë në ditë.
Ndër impiantet e prekura përfshihen rafineritë në Rjazan, Jarosllavl dhe në rajonin e Vollgës.
Të hënën, një dron ukrainas goditi rafinerinë e naftës në Kirishi, e dyta më e madhe në Rusi, gjatë një sulmi të kryer gjatë natës, duke shkaktuar zjarr në objekt. Guvernatori i rajonit të Leningradit tha se nga sulmi kishte humbur jetën një grua.
Në një artikull të botuar të martën në gazetën ruse Kommersant, ministri i Jashtëm rus, Sergei Lavrov, tha se Ukraina po shpërfill thirrjet e Trumpit për të ndalur sulmet ndaj objektivave energjetikë rusë.
Presidenti ukrainas Volodymyr Zelensky tha javën e kaluar se Kievi po vijonte sulmet ndaj objektivave të lidhur me sektorin rus të naftës, në përgjigje të goditjeve ruse ndaj infrastrukturës energjetike.
Ai tha se centralet elektrike, rrjetet energjetike, sistemet e ngrohjes dhe furnizimit me ujë në Ukrainë po përballen me sulme të vazhdueshme dhe se Moska kishte “refuzuar hapat për uljen e tensioneve për të cilët kishin folur partnerët tanë”.
