Trajneri i Spanjës, Luis de la Fuente, konfirmoi se Lamine Yamal do të jetë në dispozicion për ndeshjen e së dielës kundër Anglisë, pavarësisht shqetësimeve në gjurin e djathtë. Në një intervistë për EFE, De la Fuente tha se gjendja e yllit të Barcelonës nuk është shqetësuese, por stafi teknik vendosi ta mos rrezikojë atë në sfidën ndaj Republikës Çeke për të mos përshkallëzuar problemin. Yamal pati mundësinë të luante edhe të enjten, por nuk ndodhej në formën optimale për shkak të shqetësimeve fizike, ndaj u vendos që të qëndronte në Barcelonë dhe të rikuperohej plotësisht për duelin ndaj Anglisë.
Sipas trajnerit, shqetësimet datojnë nga ndeshja e fundit e Ligës së Kampionëve kundër Aston Villas, ku një inflamacion i lehtë në gjurin e djathtë e pengoi të ishte në gjendjen më të mirë fizike. De la Fuente theksoi se nëse do të kishte pasur ndonjë emergjencë, do të ishin të gatshëm ta aktivizonin, por nuk ia vlente të merrnin rrezik: “Fillimisht mendojmë për shëndetin e tij dhe më pas duam që të jetë në gjendje perfekte për të dielën”. Pritet që Yamal t’i bashkohet përfaqësueses në Las Rozas të enjten në mbrëmje ose të premten në mëngjes, për të zhvilluar dy seanca stërvitore para përballjes me Anglinë.
De la Fuente foli edhe për Mikel Oyarzabal, që po rikuperohet nga gripi dhe vonesa në bashkimin me kombëtaren lidhet edhe me një arsye familjare, pasi bashkëshortja e tij është në pritje të fëmijës së dytë. Trajneri deklaroi: “Jemi në pritje të lindjes së fëmijës së tij. Shpresojmë që gjithçka të shkojë mirë dhe sa më shpejt, në mënyrë që ai të mund të bashkohet me ne. Duhet të presim deri në momentin e fundit.”
Gjithashtu, De la Fuente konfirmoi se Martin Zubimendi nuk do të ketë probleme për t’u aktivizuar pavarësisht maskës mbrojtëse pas një frakture në hundë; mesfushori i Arsenalit ka luajtur më parë me maskë dhe është plotësisht i gatshëm për dy ndeshjet e radhës. Lajmi kryesor për Spanjën mbetet rikthimi i pritshëm i Lamine Yamalit, i cili pritet të jetë një nga lojtarët më të rëndësishëm në përballjen me Anglinë.