Këshilli i Lartë Gjyqësor kërkon nga Kuvendi që të miratojë një shtesë fondi prej 3.9 miliardë lekësh më shumë se fondi i parashikuar në projektbuxhetin e vitit 2027, duke argumentuar nevojën për shtimin e personelit, mbulimin e shpenzimeve operative dhe investimet në infrastrukturën gjyqësore.
Gjatë dëgjesës për buxhetin e ri në Komisionin për Nismat Qytetare, Bashkëpunimin dhe Mbikëqyrjen Institucionale të martën, kreu i KLGJ-së, Ilir Rusi paraqiti kërkesa shtesë duke ripërsëritur shqetësimet e viteve të mëparshme të këtij institucioni për investime në godina të reja të dedikuara për gjykatat.
“Pjesën më të madhe të kërkesave tona e zë infrastruktura e godinave,” tha ai, duke shtuar se “që prej vitit 2017 nuk kemi një godinë që të ketë përfunduar me funksion të dedikuar si gjykatë”.
Sipas Rusit, në sistemin e gjyqësorit nga 20 gjykata vetëm 5 prej tyre e ushtrojnë aktivitetin në godina të dedikuara, ndërsa të gjitha të tjerat janë përshtatura për gjykata.
Po ashtu, KLGJ kishte kërkesa për fonde për rritje të personelit të gjykatave dhe pagesën e orëve të gatishmërisë së gjyqtarëve dhe orëve jashtë orarit të stafit administrativ.
“Është e vërtetë që kemi trefishim të buxhetit nga vitit 2019, por këtë vit kemi 1.1 përqind më pak se viti i kaluar,” argumentoi Rusi.
Kuvendi pothuaj çdo vit përballet me kërkesa për investime dhe fonde shtesë për shtim personeli në sistemin gjyqësor, por edhe kur buxheti është akorduar këto investime nuk janë realizuar brenda vitit buxhetor për shkaqe të ndryshme.
Mosrealizimi i planit të investimeve, pavarësisht arsyetimeve të tij se pushteti vendor nuk kishte vendosur në dispozicion troje për godinat e reja, u prit me rezerva nga deputetët.
Kryetari i Komisionit, Fatmir Xhafaj, tha se Këshilli kishte “nevojë për reflektim” në lidhje me mosrealizimin e investimeve të parashikuara në buxhetin vjetor.
“Këshilli mund të ushtrojë më shumë përgjegjësi për eficencën e stafit administrativ,” i sugjeroi ai Rusit, duke shtuar se “të kërkosh lekë dhe të mos realizosh buxhete vit pas viti kjo nuk është normale”.
Ndërsa relatorja e komisionit për projektbuxhetin, deputetja Evis Kushi, vlerësoi se disa prej kërkesave shtesë nuk shoqërohen me argumentim dhe të dhëna të mjaftueshme për të justifikuar nevojat institucionale.
Sipas raportit të Kushit, projektbuxheti i përgatitur nga Ministria e Financave parashikon një financim prej 6,77 miliardë lekësh për KLGJ-në dhe sistemin gjyqësor, një shifër kjo që është 74,22 milionë lekë më pak krahasuar me buxhetin e ndryshuar të vitit 2026.
“Kërkesat shtesë janë 3,99 miliardë lekë, ose 37%, në tri drejtime: personel, shpenzime operative dhe investime,” tha Kushi, duke shtuar se “më e rëndësishmja është kërkesa për personel shtesë”.
Vetëm për investimet, KLGJ kërkon 2,97 miliardë lekë më shumë se fondi prej 957,5 milionë lekësh i parashikuar në projektbuxhet. Si prioritete, KLGJ rendit rikonstruksionin dhe zgjerimin e Gjykatës Administrative të Shkallës së Parë Tiranë, pajisjet e sigurisë dhe pajisjet kompjuterike. Një fond prej 970 milionë lekësh kërkohet gjithashtu për ndërtime të reja, të cilat, sipas KLGJ-së, kushtëzohen nga sigurimi i truallit, përgatitja e projekteve dhe koordinimi me planifikimin e qeverisë.
Kushi kërkoi nga KLGJ paraqitjen e metodologjisë dhe të dhënave mbështetëse për numrin e gjyqtarëve, analizën e ngarkesës dhe stokut të çështjeve për çdo gjykatë.
Në lidhje me investimet në godina të reja apo rikonstruksionin e atyre ekzistuese relatorja kërkoi një listë të prioriteteve të investimeve, informacion mbi gatishmërinë e projekteve të ndërtimit.
Nga ana tjetër Kushi kërkoi nga KLGJ që zgjerimi i kapaciteteve njerëzore të mbështetet në analiza konkrete të ngarkesës së gjykatave, pasi 199 pozicionet e reja që kërkohen nuk janë argumentuar sipas gjykatave dhe profileve të punës.
