Në Shqipëri po lindin më pak fëmijë se një vit më parë. Gjatë periudhës korrik-shtator 2026, numri i lindjeve ra me 10,5% krahasuar me të njëjtën periudhë të vitit 2025, ndërsa në shtatë nga 12 qarqet e vendit vdekjet ishin më të shumta se lindjet.

Sipas të dhënave të publikuara nga INSTAT, në tremujorin e tretë të këtij viti u regjistruan 5.787 lindje dhe 5.045 vdekje, me një shtesë natyrore pozitive prej 742 personash.

Tirana kryeson me numrin më të lartë të lindjeve, me 2.708 foshnja të ardhura në jetë gjatë tre muajve, ndërsa Gjirokastra regjistroi vetëm 66 lindje. Kryeqyteti ka edhe bilancin më të lartë pozitiv, me 1.380 lindje më shumë se vdekje, ndërsa Korça bilancin më negativ, me 220 vdekje më shumë se lindje.

Krahasuar me tremujorin e dytë të vitit 2026, lindjet u rritën me 13,9%, ndërsa vdekjet me 3,7%. Megjithatë, në raport me të njëjtën periudhë të vitit të kaluar, vdekjet u rritën me 0,4%.

Vetëm dy qarqe regjistruan rritje të lindjeve krahasuar me një vit më parë, ndërsa në dhjetë të tjera numri i foshnjave të lindura ra. Dibra pati rritjen më të lartë, me 3,9%, ndërsa Fieri shënoi rënien më të madhe, me 20,1%.

Sa u përket vdekjeve, Tirana regjistroi numrin më të lartë, me 1.328 raste, ndërsa Kukësi më të ulëtin, me 118. Rritja më e madhe e vdekjeve u shënua në Kukës, me 15,7%, ndërsa Dibra pati uljen më të fortë, me 17,8%.

 

Kliko këtu për të lexuar dokumentin e plotë