Vrau shqiptarin me plumb në kokë, Prokuroria në Itali kërkon 24 vite burg për autorin

Prokuroria italiane ka kërkuar 24 vite burg për Moreno Violetton, 45 vjeç, i akuzuar për vrasjen e shqiptarit Fatos Cenaj, 59 vjeç, ish-punonjës sigurie, i cili u ekzekutua me armë zjarri në qershor të vitit 2025 në Fontaniva, në provincën e Padovës.

Kërkesa për dënimin u paraqit të hënën, më 9 nëntor 2026, nga prokurorja Maria Ignazia D’Arpa. Violetto, i cili ka pranuar autorësinë e krimit, akuzohet për vrasje me dashje.

Sipas hetimeve, ngjarja ndodhi më 8 qershor 2025, kur Fatos Cenaj u qëllua me armë në kokë, ndërsa po udhëtonte me biçikletë.

Nga rindërtimi i ngjarjes prej hetuesve të Karabinierëve, dyshohet se autori e qëlloi shqiptarin nga një distancë e afërt. Shkak për krimin dyshohet të kenë qenë konfliktet e vazhdueshme mes fqinjëve.

Pas vrasjes, 45-vjeçari italian dyshohet se u përpoq të pengonte zbardhjen e ngjarjes, duke u maskuar dhe duke ndërhyrë në oraret e regjistruara nga kamera e sigurisë në banesën e tij, me qëllim krijimin e një alibie.

Ai u arrestua në dhjetor të vitit 2025, disa muaj pas ngjarjes.