Erion Veliaj ka publikuar në rrjetet sociale fjalën e eurodeputetit italian, Giorgio Gori, i cili ka kërkuar shpjegime lidhur me paraburgimin e tejzgjatur të kryebashkiakut të Tiranës. Në një deklaratë për gazetën italiane “Domani”, eurodeputeti italian ka ngritur shqetësimin për trajtimin e kreut të bashkisë Tiranë në institucionet e vuajtjes së dënimit. Madje, ai ka theksuar se e ka adresuar këtë shqetësim edhe tek Përfaqësuesja e Lartë të BE-së për Politikën e Jashtme, Kaja Kallas, por sipas tij, letrat kanë mbetur pa përgjigje. Megjithatë, ai u shpreh se nuk ka informacion të mjaftueshëm për të gjykuar nëse Veliaj është fajtor apo i pafajshëm, por theksoi se duhet të respektohet prezumimi i pafajësisë. Sipas tij, në këtë rast mungojnë garancitë minimale, ndërsa nuk është zhvilluar as një seancë dëgjimore. Gori e lidhi çështjen edhe me procesin e integrimit europian të Shqipërisë, duke e cilësuar problematike mbajtjen në paraburgim të personave që janë ende nën hetim. Ai tha se një pjesë e konsiderueshme e të burgosurve në Shqipëri nuk kanë një dënim përfundimtar dhe se kjo është një çështje që duhet të ngrihet gjatë negociatave me BE-në.