Fitorja 2-1 e Bayernit ndaj Mainzit u shoqërua me një lajm shqetësues për bavarezët. Manuel Neuer u detyrua të largohej i dëmtuar nga fusha pak para përfundimit të pjesës së parë, duke rikthyer shqetësimet për problemet fizike që e kanë shoqëruar gjatë javëve të fundit.

Ndeshja ishte historike për portierin 40-vjeçar, i cili me aktivizimin si titullar u bë lojtari më i moshuar që ka luajtur ndonjëherë për Bayernin në Bundesligë, në moshën 40 vjeç e 225 ditë. Neuer la pas rekordin e Bernd Dreher, i cili në vitin 2007 kishte luajtur në moshën 40 vjeç e 198 ditë.

Megjithatë, rekordi personal u shoqërua me një moment të hidhur. Në minutën e 40-të, gjatë një goditjeje dënimi të Mainz, Neuer tentoi të largonte topin, por nuk arriti ta kontrollonte pas një devijimi të lehtë me kokë nga Jonathan Tah. Topi përfundoi te Lee, i cili shënoi për vendasit.

Në të njëjtin moment, portieri gjerman mbeti i shtrirë në fushë, duke mbajtur këmbën e djathtë. Pas ndihmës mjekësore, ai u largua me stafin e Bayernit dhe u zëvendësua nga Jonas Urbig.

Për fatin e bavarezëve, goli i Mainz u anulua pas ndërhyrjes së VAR-it, për shkak të pozicionit jashtë loje. Mësohet se ai do të qëndrojë të paktën dy muaj jashtë.

Dëmtimi i Neuer është veçanërisht shqetësues pasi portieri ka pasur probleme të përsëritura me një irritim të tendinave në këmbë. Pas ndeshjes së Champions League kundër Atletico Madridit, të fituar 2-0 nga Bayern, ai kishte pranuar se kishte ndier dhimbje gjatë ecjes, madje edhe në momentin kur zgjohej në mëngjes.

Sa i përket ndeshjes, Bayern arriti të marrë tri pikët. Joshua Kimmich zhbllokoi rezultatin në minutën e 14-të, ndërsa Lennart Karl dyfishoi shifrat në minutën e 57-të. Mainz ngushtoi diferencën me Tietz në minutën e 90-të plus 3, por pa arritur të shmangte humbjen.

Kështu, bavarezët festuan një tjetër fitore në Bundesligë, por vëmendja tashmë është përqendruar te gjendja fizike e Neuer, dëmtimi i të cilit mund të kthehet në një problem serioz për skuadrën.