Forca e Sigurisë së Kosovës ka bërë të ditur pjesëtarë të Togut për Intervenime nga Policia Ushtarake e Forcës së Sigurisë së Kosovës kanë marrë pjesë në trajnimin ndërkombëtar “Training Based on SOP – Standards of Interventions”, i cili është mbajtur në Slunj të Kroacisë.
FSK-ja bën të ditur se trajnimi është udhëhequr nga instruktorë të Ushtrisë Kroate, përkatësisht të Njësisë Kundër Terrorizmit të Policisë Ushtarake Kroate, njofton Dukagjini.
“Gjatë këtij trajnimi u zhvilluan aktivitete të ndryshme praktike, me fokus në ngritjen e kapaciteteve profesionale dhe avancimin e shkathtësive në fushën e intervenimeve”, thuhet në njoftimin e FSK-së.
Sipas njoftimit të FSK-së, përmes këtij trajnimi pjesëtarët kanë avancuar shkathtësitë taktike, kanë shkëmbyer përvoja profesionale dhe kanë forcuar bashkëpunimin ndërkombëtar.
FSK-ja ka theksuar se pjesëmarrja në trajnime të tilla është pjesë e përkushtimit për ngritjen e vazhdueshme të profesionalizmit, gatishmërisë dhe kapaciteteve operacionale të pjesëtarëve të saj.