Ligjin për Specialen, VV: Po diskutojmë me PDK-në, synojmë pajtueshmëri

Shefja e Grupit Parlamentar të VV-së, Arbërie Nagavci ka njoftuar se seanca e radhës plenare në Kuvend është caktuar të mbahet të enjten, në orën 10:00.

Ajo ka thënë se, përveç pikave të rregullta, do të shqyrtohen edhe katër marrëveshje ndërkombëtare në fushën e drejtësisë.

Nagavci ka folur edhe për kthimin e Lligjit për Specialen në Kuvend. Ajo ka deklaruar se janë duke diskutuar me PDK-në si parti iniciuese e ligjit.

“Ne jemi dëshmitarë se presidentja e ka kthyer projektligjin. Në lidhje me letrën e presidentes, ka praktika edhe për këtë çështje. Ne jemi duke diskutuar me PDK-në, si partia iniciuese, dhe e kemi bërë të qartë se nuk është mirë të krijojmë një situatë të re mes presidentes dhe Kuvendit.

Sa u përket çështjeve përmbajtjesore, besoj se do të arrijmë një pajtueshmëri. Ne e kemi të qartë se tashmë ka një aktgjykim të Kushtetueses dhe ka edhe dy raste të tjera që e bëjnë të qartë se ligji nuk mund të amandamentohet”, tha ajo.