Një 34-vjeçar është arrestuar në Vlorë, pasi dyshohet se tentoi të përdorte armë zjarri gjatë një konflikti me një 41-vjeçar.
Ngjarja u parandalua nga ndërhyrja e shërbimeve të Policisë, të cilat finalizuan operacionin e koduar “Yacht”.
Sipas njoftimit zyrtar, konflikti ndodhi mbrëmjen e djeshme, rreth orës 20:50, në lagjen “Uji i Ftohtë”, në vendin e quajtur “Rrapi”. Gjatë patrullimit, punonjësit e Policisë konstatuan një përplasje për motive të dobëta mes 34-vjeçarit Mario Meçanaj, banues në Vlorë, dhe 41-vjeçarit E. H., banues në Tiranë.
Policia ndërhyri menjëherë për të parandaluar përshkallëzimin e konfliktit. Në momentin e ndërhyrjes, 34-vjeçari tentoi të largohej me vrap, por u kap dhe u neutralizua nga efektivët.
Nga veprimet e para hetimore dyshohet se, gjatë konfliktit, ai ka tentuar të përdorë një pistoletë, të cilën më pas e ka hedhur në rërë, në vendin ku u kap nga policia. Arma e zjarrit u gjet dhe u sekuestrua në cilësinë e provës materiale.
Gjithashtu, gjatë kontrollit të automjetit të 34-vjeçarit, uniformat blu gjetën dhe sekuestruan edhe një përforcues metalik grushti.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.