Agjencitë evropiane të sigurisë po hetojnë mundësinë që kërcënimet e koordinuara për bomba, të cilat gjatë kësaj jave kanë shënjestruar dhjetëra fluturime në Evropë, të kenë origjinën nga Rusia.
Lajmi bëhet i ditur nga gazeta britanike “Financial Times”, e cila citon zyrtarë të inteligjencës, sipas të cilëve shërbimet evropiane kanë nisur një hetim ndërkufitar për të identifikuar autorët dhe burimin e kërcënimeve.
Disa përfaqësues të inteligjencës evropiane e konsiderojnë origjinën ruse si një nga pistat më të mundshme, duke u bazuar te motivet e mundshme, mënyra e veprimit, precedentët e mëparshëm dhe të dhënat e para të mbledhura nga hetuesit.
Një nga hipotezat që po shqyrtohet është se pas këtyre kërcënimeve mund të qëndrojnë aktivistë pro-Kremlinit ose grupe hakerash. Megjithatë, zyrtarët evropianë paralajmërojnë se identifikimi konkret i përgjegjësve mund të kërkojë kohë dhe se nuk përjashtohet mundësia që hetimet të mos arrijnë në një përfundim përfundimtar.
Edhe në rast se provohet përfshirja e aktivistëve pro-Kremlinit, mbetet për t’u përcaktuar nëse dhe në çfarë mase shërbimet ruse të inteligjencës kanë drejtuar, nxitur apo autorizuar këto operacione.
Sipas hetuesve, personat përgjegjës për këto kërcënime nuk konsiderohen aktualisht si një rrezik real për sigurinë e aviacionit evropian.
