Fiat po shqyrton rikthimin e Punto-s, modelit të njohur me të cilin synon të rifitojë pjesë në segmentin e tregut që sot kryesohet nga Renault Clio. Megjithatë, ky rikthim nuk është i afërt: sipas drejtorit ekzekutiv të Fiatit, Arnaud Belloni, prezantimi i modelit të ri pritet brenda dy deri në tri vjetësh.
Belloni e konsideron të nevojshme që oferta e markës të përfshijë përsëri një makinë të tillë. Ai ka vënë në dukje se ndalimi i prodhimit të Punto-s i hapi rrugë Renault-it për të konsoliduar pozicionin e Clio-s.
Të lidhura
None found
Në vlerësimin e tij, tërheqja e Fiat Punto-s dhe Ford Fiesta-s nga tregu, së bashku me mungesën e një gjenerate të re të Volkswagen Polo-s, krijuan kushte që Renault Clio të mbizotëronte në këtë segment dhe të shënonte shitje mjaft të suksesshme.
Për Punto-n e rikthyer, Fiat parashikon motorë tradicionalë me djegie të brendshme dhe variante hibride, duke mos e kufizuar ofertën vetëm te një version elektrik.
Si bazë për zhvillimin e makinës mund të shërbejë platforma CMP/eCMP e grupit Stellantis. Ajo përdoret tashmë në disa modele kompakte dhe SUV të markave të grupit, çka do t’i jepte Fiatit mundësinë ta realizonte modelin e ri pa investime të mëdha.
Historia e Punto-s nisi në vitin 1993, kur u prezantua si zëvendësues i Uno-s. Pas gjeneratës së dytë, të hedhur në treg në vitin 1999, erdhi Grande Punto në vitin 2005. Me disa përditësime gjatë kësaj periudhe, Grande Punto vijoi të ishte në treg deri në vitin 2018.
