Ambasadori i Shteteve të Bashkuara të Amerikës në Tiranë, Eric Wendt, ka prezantuar drejtimet kryesore ku do të përqendrohet bashkëpunimi mes Uashingtonit dhe Tiranës. Në një mesazh drejtuar qytetarëve shqiptarë, diplomati amerikan ka renditur mbrojtjen, ekonominë dhe sigurinë si tri shtyllat mbi të cilat synon të mbështetet forcimi i marrëdhënieve dypalëshe.
Në nisje të mesazhit, Wendt ka shprehur mirënjohjen ndaj presidentit amerikan Donald Trump dhe sekretarit të Shtetit, Marco Rubio, për besimin që i kanë dhënë duke e ngarkuar me detyrën diplomatike në Shqipëri.
Ambasadori ka bërë të ditur gjithashtu se përfaqësia diplomatike amerikane do të ndërmarrë një proces vlerësimi, rezultatet e të cilit do të shërbejnë për përcaktimin e hapave të ardhshëm në marrëdhëniet mes dy vendeve.
Një nga objektivat kryesore të diplomatit është forcimi i bashkëpunimit në fushën e mbrojtjes. Sipas tij, Shqipëria dhe Shtetet e Bashkuara duhet të vijojnë investimet në kapacitetet ushtarake, duke garantuar njëkohësisht përmbushjen e përgjegjësive që kanë si vende anëtare të NATO-s.
Në planin ekonomik, Wendt synon zgjerimin e marrëdhënieve tregtare dhe nxitjen e investimeve mes dy vendeve. Ai thekson se krijimi i mundësive të reja ekonomike duhet të sjellë përfitime konkrete si për qytetarët shqiptarë, ashtu edhe për ata amerikanë.
Një tjetër pikë e rëndësishme e agjendës së tij është bashkëpunimi në çështjet e sigurisë, veçanërisht në përballjen me krimin e organizuar që vepron përtej kufijve shtetërorë.
Ambasadori ka nënvizuar nevojën për koordinim më të ngushtë mes institucioneve të të dyja vendeve, me qëllim goditjen e krimit transnacional dhe mbrojtjen e interesave të përbashkëta.
Në mesazhin e tij, Wendt e përmbledh vizionin për marrëdhëniet shqiptaro-amerikane në tri objektiva: të dy vendet të bëhen më të forta, më të begata dhe më të sigurta.
Përmes këtyre prioriteteve, diplomati amerikan ka sinjalizuar fushat ku pritet të përqendrohet angazhimi i Ambasadës së SHBA-së në Tiranë gjatë mandatit të tij.