Presidenti ukrainas, Volodymyr Zelenskyy, u ka kërkuar vendeve të Amerikës Latine të ndihmojnë Ukrainën me pajisje për riparimin e rrjetit energjetik, i cili është dëmtuar nga sulmet e vazhdueshme ruse, përcjell Euronews.
Gjatë fjalës së tij në Samitin e 30-të Ibero-Amerikan, të zhvilluar në Madrid, Zelenskyy deklaroi se çdo central elektrik në Ukrainë është dëmtuar nga sulmet, në një mënyrë ose në një tjetër. Ai kërkoi bashkëpunim ndërkombëtar për të siguruar pajisjet e nevojshme dhe për të riparuar infrastrukturën energjetike sa më shpejt.
“Na duhen pajisje që funksionojnë me rrjetin tonë energjetik dhe na duhen shpejt. Prandaj, ju lutemi të na mbështesni drejtpërdrejt, duke krijuar lidhje me kompanitë dhe prodhuesit tuaj, në mënyrë që këto furnizime të mbërrijnë në Ukrainë sa më parë”, u shpreh presidenti ukrainas.
Samiti mblodhi përfaqësues të 22 vendeve, kryesisht nga Amerika Latine, ku marrin pjesë shtete hispanofone dhe luzofone. Në takim ishin të pranishëm edhe kryeministri spanjoll, Pedro Sánchez, presidenti i Guatemalës, Bernardo Arévalo, presidenti i Hondurasit, Nasry Asfura, sekretari i Përgjithshëm i OKB-së, António Guterres, si dhe presidenti i Këshillit Evropian, António Costa.
Zelenskyy theksoi se Ukraina ka kërkuar që prej fillimit të luftës të forcojë marrëdhëniet me vendet e Afrikës dhe Amerikës Latine, si dhe të rrisë mbështetjen e tyre diplomatike. Ai vuri në dukje se përfaqësimi i Ukrainës në këtë samit është një zhvillim i rëndësishëm dhe se vendi po siguron gjithnjë e më shumë mbështetje nga shtetet e rajonit në votimet në Asamblenë e Përgjithshme të Kombeve të Bashkuara.
Presidenti ukrainas u bëri gjithashtu thirrje udhëheqësve të vendeve të rajonit të reagojnë ndaj sulmeve ruse, të cilat ai i cilësoi si “vrasje masive” përmes bombardimeve dhe dronëve.
Ndër pajisjet që Ukraina kërkon të sigurojë janë transformatorë, kabllo elektrike, pajisje elektronike, si dhe gjeneratorë me naftë dhe gaz, të nevojshëm për të mbajtur funksionale infrastrukturën e vendit.
Sulmet e përsëritura ruse ndaj infrastrukturës energjetike gjatë javëve të fundit kanë shtuar shqetësimet për një tjetër dimër të vështirë në Ukrainë. Të martën, kryebashkiaku i Kievit, Vitali Klitschko, deklaroi se furnizimet në kryeqytet ishin në një situatë “jashtëzakonisht të vështirë”.
Vizita e Zelenskyyt në Madrid zhvillohet në një kohë kur po vijojnë përpjekjet e udhëhequra nga Shtetet e Bashkuara për të rifilluar negociatat e paqes mes Kievit dhe Moskës. Bisedimet trepalëshe pritet të rinisin javën e ardhshme në Emiratet e Bashkuara Arabe.
Gjatë qëndrimit në Spanjë, Zelenskyy u takua edhe me kryeministrin Pedro Sánchez dhe mbretin Felipe VI, të cilit i shprehu ngushëllimet për përplasjen e trenave në Toledo. Ai e informoi gjithashtu për pasojat e sulmeve të përditshme ruse dhe nevojën për forcimin e mbrojtjes ajrore të Ukrainës.
