Asamblistja e Lëvizjes Vetëvendosje (LVV) në Prizren, Dafina Alishani, ka kritikuar vendimin e Komunës për subvencionimin e transportit urban, duke pretenduar se përmes këtij programi po favorizohet një biznes i caktuar.
Në një postim në Facebook, Alishani ka thënë se Komuna e Prizrenit e ka subvencionuar një biznes që, sipas saj, i kishte sjellë autobusët në qytet pa u përmbyllur thirrja publike për marrjen e linjës së transportit urban.
Ajo ka pretenduar se thirrja publike ishte përgatitur në atë mënyrë që biznesi në fjalë të përmbushte kriteret, ndërsa ka ngritur dyshime për favorizim të operatorit.
“Pra ky subvencionim është bërë për dosta të cilëve ju është kurdisur thirrja publike. Meqë biznesi për tu diferencuar nga konkurrenca i është dashur ti blej autobusët e rinj dhe ti bie tamam me kriteret e kurdisura, ju është deshtë me investu shumë dhe tash komuna ja kthen borxhin në qafë të qytetarëve”, ka shkruar Alishani.
Ajo ka vlerësuar se Komuna ka prioritizuar, siç e ka quajtur, favorizimin e personave të afërt me qeverisjen lokale, në vend të zhvillimit të trafikut urban.
“Komuna e Prizrenit ka prioritet favorin për dosta e jo trafikun urban!”, ka deklaruar ajo.
Alishani ka ngritur gjithashtu çështjen e shtrirjes së subvencionimit, duke pyetur se si do të reagonin qytetarët nëse një kryetar nga LVV-ja do të subvenciononte vetëm linjën urbane dhe jo edhe linjat në fshatra.
Në fund, ajo u ka bërë thirrje qytetarëve që ta shfrytëzojnë shërbimin e transportit falas, ndonëse ka paralajmëruar se subvencionimi do t'i kushtojë shumë Komunës.
“Për fund, meqë ky vendim ka kaluar me shumicë votash, dilni dhe shfrytëzoni në maksimum këtë shërbim sepse ky subvencionim do ti kushton shumë komunës. Edhe pse qëllimi nuk jeni ju, ju lutem shfrytëzoni sa më shumë këtë të drejtë”, ka shkruar ajo.
Ndërkaq, Alishani ka pretenduar se bizneset e tjera që operojnë në linja të ndryshme të transportit nuk përfitojnë subvencione.
Komuna e Prizrenit kishte njoftuar më herët se programi i subvencionimit të transportit urban do të niste së zbatuari më 2 nëntor 2026. Sipas njoftimit të saj, subvencionimi do të bëhet me 1.20 euro për kilometër, për një periudhë pesëvjeçare, me mundësi vazhdimi.
Nga programi parashihet të përfitojnë disa kategori të qytetarëve, përfshirë pensionistët, nxënësit, studentët, punëtorët e arsimit, pjesëtarët e Policisë dhe të Ushtrisë, zjarrfikësit, si dhe personat e dalë nga lufta dhe familjarët e tyre.
Shënim redaksional: Pretendimet për kurdisje të thirrjes publike dhe favorizim të biznesit janë akuza të asamblistes dhe nuk duhet të paraqiten si fakte të vërtetuara pa dokumente ose përgjigje nga Komuna. Për një raportim të balancuar, duhet kërkuar qëndrimi i Komunës së Prizrenit lidhur me këto pretendime dhe sqarim për procedurën e përzgjedhjes së operatorit. /Telegrafi/
