Komuna e Prishtinës ka njoftuar se është arritur marrëveshje me Sindikatën dhe se puna e punëtorëve teknikë në shkolla pritet të rifillojë gjatë javës së ardhshme.
Komuna ka njoftuar se veprimet e nevojshme administrative janë ndërmarrë dhe se pagesat e para janë realizuar sot, ndërsa pjesa tjetër pritet të përfundojë të martën.
Komuna ka bërë të ditur se deri në rikthimin e punëtorëve teknikë, duke filluar nga sot, pastrimi dhe mirëmbajtja e shkollave do të mbulohen nga Ndërmarrja Publike Banesore dhe ndërmarrja “Pastrimi”.
“Drejtoria e Arsimit do të koordinojë dhe mbikëqyrë zbatimin e këtyre masave, për të siguruar kushte të përshtatshme për nxënësit dhe mësimdhënësit. Shqetësimet tuaja për higjienën në shkolla janë edhe shqetësimet tona. Shëndeti dhe siguria e fëmijëve mbeten prioriteti ynë. Presim që procesi mësimor të vazhdojë normalisht, ndërsa çdo situatë që cenon kushtet higjieno-sanitare do të trajtohet me përgjegjësi dhe me masat e nevojshme”, thuhet në njoftimi e Drejtorisë së Arsimit në Prishtinë.
Njoftimi vjen pasi në dy shkolla në Prishtinë, “Ismail Qemali” dhe “Mehmet Gjevori”, u paralajmërua bojkoti i mësimit të premten shkaku i papastërtisë.
Edhe
Pas shkollave të mesme, greva pritet të përfshijë edhe ato fillore në Prishtinë
Punëtorët teknikë të disa shkollave të mesme në kryeqytet, qysh në ditën e parë të shtatorit kanë nisur grevën për shkak të mospagesave fillimisht dhe kërkesës që të respektohet paga minimale. Ata kishin thënë se ajo do të ndërpritet vetëm kur të përmbushen të gjitha obligimet ndaj tyre nga Komuna e Prishtinës.
Kësaj greve në mesin e tetorit ju bashkuan edhe ata të shkollave fillore. Ata kanë hyrë në grevë për shkak të mosdhënies së pagave dhe vonesave në ekzekutimin e tyre. Gjithashtu as shuma e pagës nuk ishte ekzekutuar sa minimalja e përcaktuar nga Qeveria e Kosovës, të cilën punëtorët teknikë e kanë kërkuar që nga fillimi dhe kishin paralajmëruar se nuk e ndalin grevën deri në plotësimin e kësaj kërkese.
