Meloni i kërkon BE-së të flasë me një zë për Ukrainën: Jemi të çorganizuar dhe po dëmtojmë besueshmërinë tonë

Në një letër drejtuar presidentit të Këshillit Europian, António Costa, ajo ka kërkuar që kjo çështje të përfshihet në axhendën e takimit joformal të liderëve europianë, që do të mbahet në Dublin më 13 nëntor.

Në letrën e siguruar nga POLITICO, Meloni shprehet se mënyra se si Europa po angazhohet në diskutimet për Ukrainën krijon përshtypjen e mungesës së koordinimit dhe dobëson pozicionin e saj në arenën ndërkombëtare.

“Duke pasur parasysh zhvillimet e fundit, ndihem e detyruar t’i rikthehem një çështjeje që e kam ngritur vazhdimisht në Këshillin Europian. Bëhet fjalë për nevojën që Europa të flasë me një zë të vetëm për Ukrainën. Kjo nuk mund të shtyhet më”, shkruan kryeministrja italiane.

Ajo ka kritikuar gjithashtu numrin e madh të formateve dhe nismave diplomatike që po zhvillohen paralelisht për të diskutuar të ardhmen e konfliktit. Mes tyre përmenden takimet në Miami dhe Oslo, bisedimet e Koalicionit të të Gatshmëve dhe Komunitetit Politik Europian, si dhe kontaktet telefonike të kryeministrit finlandez Alexander Stubb dhe homologut të tij norvegjez Jonas Gahr Støre me presidentin rus Vladimir Putin.

“Të veprojmë në mënyrë të çorganizuar, me nisma që pasojnë dhe mbivendosen me njëra-tjetrën, nuk do të na ndihmojë, as me partnerët tanë dhe as me ata që duhet të bindim për t’i dhënë fund këtij agresioni të pakuptimtë. Jam e bindur se të gjithë e kuptojmë se, duke projektuar imazhin e një Europe të çorganizuar, nuk bëjmë gjë tjetër veçse u shërbejmë interesave të atyre që dëshirojnë që kjo luftë të vazhdojë. Dhe mendoj se kjo është e papranueshme, duke pasur parasysh se jetët njerëzore dhe e ardhmja e sigurisë sonë janë në rrezik”, shkruan Meloni.

Pas kërkesës për koordinim, qëndron edhe shqetësimi i Romës për përfshirjen e saj në diskutimet diplomatike për Ukrainën.

Sipas POLITICO-s, Italia është lënë jashtë disa takimeve të zhvilluara në Miami gjatë tetorit dhe në Bruksel këtë javë, ndërsa ka marrë pjesë në diskutimet në Oslo me ftesë të qeverisë norvegjeze.

Ndërkohë, formati i negociatave po përqendrohet gjithnjë e më shumë te grupi E3, i përbërë nga Mbretëria e Bashkuar, Franca dhe Gjermania, së bashku me Bashkimin Europian, NATO-n dhe Ukrainën.

Gjatë vitit të fundit, Meloni ka mbështetur vazhdimisht idenë e emërimit të një të dërguari të posaçëm europian për negociatat e paqes mes Rusisë dhe Ukrainës. Ajo argumenton se BE-ja duhet të ketë një përfaqësues të qartë që të artikulojë qëndrimin e përbashkët dhe të angazhohet drejtpërdrejt në procesin diplomatik.

Këtë propozim e ka mbështetur edhe ministri i Jashtëm italian, Antonio Tajani, i cili ka kërkuar një përfaqësues europian që të mund të negociojë dhe të shprehë një qëndrim të qartë në emër të unionit.

Megjithatë, Meloni ka sqaruar se kërkesa e saj nuk synon të sigurojë një pozicion të veçantë për Italinë apo një rol personal në negociata.

“Nuk po kërkoj një vend për Italinë në këtë apo atë format”, përfundon ajo në letrën drejtuar António Costës.

Top Channel