Komediani Russell Brand, dikur një prej prezantuesve më të njohur në Britani dhe protagonist i disa filmave të Hollivudit, rrezikon një dënim të gjatë me burg, pasi të enjten u shpall fajtor nga një gjykatë në Londër për përdhunimin e një gruaje dhe sulmet seksuale ndaj tri grave të tjera.
Prokurorët thanë se Brand, ish-bashkëshorti i këngëtares amerikane Katy Perry, ishte i fiksuar pas seksit dhe i përdorte gratë për të përmbushur dëshirat e tij. Njëra prej viktimave tha se ai e trajtonte “si një kafshë”.
Prokurorët i thanë trupit gjykues në Gjykatën e Southwark se 51-vjeçari, i cili luajti në filmat “Get Him to the Greek” dhe “Arthur”, mund të ishte humorist dhe joshës kur dëshironte, por ishte gjithashtu i pamëshirshëm, llogaritës dhe manipulues. Sipas tyre, ai interesohej vetëm të merrte nga gratë atë që dëshironte.
“Provat treguan se Brand ishte një grabitqar seksual i kalkuluar, i cili përdorte famën dhe pushtetin e tij në rritje për të krijuar situata ku mund t’u afrohej seksualisht grave, pavarësisht dëshirave të tyre”, tha jashtë gjykatës David Roberts, prokuror i lartë i çështjes.
Brand tashmë rrezikon burgimin, ndërsa mund të përballet edhe me veprime të tjera ligjore, pasi policia bëri të ditur se ai është ende nën hetim për dy raste të tjera të dyshuara përdhunimi, njëri prej të cilëve përfshin një vajzë që në atë kohë ishte 16 vjeçe.
Brand, i njohur për mënyrën e tij të të folurit pa ndërprerje dhe pamjen ekstravagante, i kishte mohuar të gjitha akuzat, si dhe çdo marrëdhënie seksuale pa pëlqim. Ai kishte deklaruar se ngjarjet, të cilat datojnë më shumë se 20 vjet më parë, ose kishin ndodhur me pëlqim, ose ishin interpretuar apo rindërtuar në mënyrë të ndryshme nga realiteti.
Gjatë dëshmisë, ai pranoi se kishte kaluar një pjesë të madhe të jetës së tij në “aventura seksuale të pamatura dhe marrëzi”, por këmbënguli se pëlqimi seksual ishte një parim themelor për të.
Megjithatë, pas një gjyqi katërjavor, juria e shpalli fajtor për përdhunim dhe tri sulme seksuale të kryera gjatë periudhës 2004–2009. Ai u shpall i pafajshëm për dy akuza të tjera përdhunimi dhe një akuzë për tentativë sulmi të pahijshëm seksual.
Gjyqtari Joel Bennathan tha se Brand, të cilit iu refuzua lirimi me kusht, do të dënohej të hënën dhe se përballej me një periudhë të gjatë burgimi.
Brand është një nga personazhet e famshëm më të njohur në Britani që janë dënuar për vepra penale seksuale në vitet e fundit. Raste të tjera përfshijnë pranimin nga gazetari i BBC-së, Huw Edwards, dy vjet më parë, se kishte pasur në zotërim imazhe të pahijshme të fëmijëve, si dhe dënimin e artistit Rolf Harris në vitin 2014 për sulme ndaj vajzave të mitura.
Çështja ka rikthyer pyetjet mbi mënyrën se si industria e argëtimit trajton ankesat ndaj personazheve të saj të njohur. Inspektorja e policisë Laura Nelson, e cila drejtoi hetimin, tha se priste që edhe gra të tjera të dilnin përpara.
“Mendoj se ka edhe viktima të tjera dhe, nëse dëshirojnë ta raportojnë këtë tek ne, sigurisht që do ta trajtojmë me seriozitet”, tha ajo për Reuters.
Prokurorët thanë se veprimet e paligjshme të Brand shtriheshin përgjatë viteve kur ai kaloi nga shfaqjet e humorit në ambiente të vogla, në prezantues televiziv dhe yll të filmave të Hollivudit.
Gjykata dëgjoi dëshmi emocionale dhe të forta nga gjashtë gratë që kishin bërë denoncimet, identiteti i të cilave mbrohet me anonimitet të përjetshëm.
Asnjëra prej grave nuk e njihte tjetrën, por të gjitha iu drejtuan policisë pas një dokumentari televiziv dhe raportimeve në shtyp në vitin 2023, ku gra të tjera ngritën akuza të veçanta ndaj Brand. Këto gra nuk ishin pjesë e procesit penal në fjalë.
Gjatë dëshmive, gratë përshkruan një ndryshim të menjëhershëm në sjelljen e Brand gjatë takimeve me të, duke thënë se ai merrte një pamje me sy të zgurdulluar dhe sillej në mënyrë maniakale.
Njëra prej grave tha se, më pak se një minutë pasi ishte takuar me të në një festë në një bar, ai i kishte kapur gjoksin.
Një tjetër viktimë, e cila e përshkroi veten si një fanse të Brand, tha se kishte shkuar në shtëpinë e tij për të kryer marrëdhënie seksuale me pëlqimin e saj, por më pas ai kishte hequr prezervativin dhe e kishte përdhunuar analisht. Pas kësaj, ai e kishte urdhëruar të pastronte njollat e gjakut në çarçafë.
Gjatë gjithë karrierës së tij, Brand ka folur hapur për betejat e tij me varësinë nga droga dhe varësinë seksuale, duke shkruar për të dyja në autobiografinë e tij të vitit 2007, “My Booky Wook”.
Një dëshmitar, ish-mik i tij me të cilin Brand kishte jetuar më vonë, i tha gjykatës se komediani ishte mburrur se dëshironte të kryente marrëdhënie seksuale me 5 mijë gra. Ish-asistentja e tij personale, Helen Berger, e cila punoi për të nga viti 2006 deri në vitin 2007, tha se ai kishte “një oreks seksual të çmendur”.
“Ai nuk dukej kurrë i lumtur pas seksit, përkundrazi, dukej më shumë i dëshpëruar”, tha ajo në një deklaratë dëshmie.
Brand u bë i njohur në Britani si drejtues i një emisioni shoqërues të programit “Big Brother”, në kanalin televiziv Channel 4.
Gjatë viteve 2000, ai u bë një figurë e pranishme rregullisht në televizion dhe radio, përpara se të merrte role në një sërë filmash. Në vitin 2010, ai u martua me Perry-n, një marrëdhënie që, sipas dëshmisë së tij në gjykatë, i solli “një famë marramendëse”. Martesa përfundoi pas 14 muajsh.
Nelson tha se Perry nuk ishte kontaktuar si dëshmitare e mundshme, por shtoi se ajo mund t’i drejtohej gjithmonë policisë nëse kishte ndonjë informacion.
Në vitet që pasuan, Brand u largua nga puna në televizionin dhe kinemanë tradicionale, duke ndërtuar një numër të madh ndjekësish në rrjetet sociale si komentator kundër establishmentit. Ai trajtonte tema që lidheshin me politikën, spiritualitetin dhe fenë. Në vitin 2024, pasi akuzat ishin bërë publike, ai u pagëzua si i krishterë.
“Shpresoj që ky vendim fajësie të përcjellë një mesazh të qartë se askush nuk është mbi ligjin, pavarësisht se sa i famshëm apo i fuqishëm mund të jetë”, tha Andy Furphy, superintendent detektiv në Policinë e Londrës, shkruan Reuters.
