Të paktën 7 të vrarë nga sulmet ukrainase në Luhansk, goditet një autobus me civilë
Të paktën shtatë persona kanë humbur jetën dhe 14 të tjerë janë plagosur nga sulmet ukrainase në rajonin e Luhanskut, në lindje të Ukrainës, i cili ndodhet nën kontrollin rus. Lajmi është bërë i ditur nga autoritetet e emëruara nga Moska në këtë rajon.
VIDEO- Sulmet ukrainase në Luhansk
Sipas guvernatorit Leonid Pasechnik, pesë persona u vranë dhe 13 të tjerë u plagosën pasi një autobus u godit gjatë lëvizjes drejt kryeqytetit të rajonit, Luhansk. Dy prej të plagosurve ndodhen në gjendje jashtëzakonisht kritike, sipas raportimeve.
Në një tjetër sulm në zonën e Rovenkit, humbën jetën dy persona që udhëtonin me një automjet shpërndarjeje. Ndërkohë, një tjetër person u plagos nga një sulm ndaj një minibusi në zonën e Perevalskut.
Deri më tani nuk janë bërë të ditura llojet e armëve të përdorura në këto sulme. Rajoni i Luhanskut, pjesa më e madhe e të cilit kontrollohet nga Rusia, është përfshirë vazhdimisht në sulme gjatë luftës mes dy vendeve.
Ushtria ukrainase godet rregullisht objektiva nën kontrollin rus, kryesisht përmes dronëve, në kuadër të luftës që nisi me pushtimin rus të Ukrainës në shkurt të vitit 2022.
