Kaloi gati një vit në burgun e Dubait për akuza droge, 23-vjeçarja britanike kthehet në shtëpi dhe nis karrierë të pazakontë

Është fjala për Bella Daggett, nga Yorkshire, e cila ka lënë pas periudhën e vështirë të burgimit në Emiratet e Bashkuara Arabe dhe tashmë fiton para duke publikuar fotografi dhe video provokuese në platforma me abonim.

Sipas raportimeve të mediave britanike, e reja u ofron ndjekësve përmbajtje me pagesë në platformën “Fansly”, ku abonimi bazë kushton rreth 7.40 paund në muaj. Ndërsa për paketën premium, të cilën ajo e reklamon si një përvojë virtuale të ngjashme me një lidhje në çift, abonentët duhet të paguajnë deri në 148 paund në muaj.

Bella është shfaqur gjithashtu me një pseudonim tjetër në platformën Stripchat, ku modelet transmetojnë drejtpërdrejt për përdoruesit kundrejt pagesave dhe bakshisheve.

Makthi për të renë nisi në mars të vitit 2025, vetëm pesë javë pasi ishte zhvendosur në Dubai për të nisur një punë të re në sektorin e rekrutimit. Ajo ishte transferuar në Emiratet e Bashkuara Arabe me shpresën për të ndërtuar një jetë të re dhe për të përfituar nga një ofertë e mirëpaguar pune, të cilën ia kishte bërë një biznesmen me të cilin kishte bashkëpunuar më parë në Britani.

Megjithatë, planet e saj u ndërprenë kur policia e Dubait kreu një kontroll në pronën ku ajo qëndronte dhe e arrestoi së bashku me një burrë tjetër. Familjarët e saj këmbëngulën se Bella nuk kishte përdorur drogë dhe se ishte përfshirë në këtë situatë për shkak të shoqërisë së gabuar dhe personave me të cilët qëndronte.

Autoritetet e Emirateve të Bashkuara Arabe nuk publikuan asnjëherë detaje të plota mbi akuzat konkrete ndaj saj. Gjatë kohës që mbesa ndodhej në paraburgim, gjyshja e saj, Heather Smith, deklaroi për “Daily Mail” se vajza ishte arrestuar për shkak të personave me të cilët shoqërohej. Ajo pretendoi gjithashtu se analizat e kryera nuk kishin zbuluar gjurmë droge në organizmin e saj. Familja e 23-vjeçares pretendoi se kushtet e burgimit ishin jashtëzakonisht të vështira.

Gjyshja tregoi se Bella kishte kaluar një muaj pa bërë dush dhe rreth tre muaj pa ndërruar rrobat. Ajo deklaroi se të burgosurat femra trajtoheshin më keq se meshkujt, të cilët, sipas saj, kishin mundësi të dilnin jashtë, të merreshin me sport dhe të përdornin televizorë apo lojëra elektronike.

Ndërkohë, nëna e saj, Lucinda Smith, 46 vjeçe, nisi një fushatë në GoFundMe për të mbuluar shpenzimet ligjore dhe të udhëtimit, duke mbledhur afro 1,500 paund. Në thirrjen e saj për ndihmë, ajo shkruante se familja kishte prova për pafajësinë e vajzës dhe se po bënte gjithçka për ta kthyer atë në shtëpi.

Pas muajsh pasigurie, në janar akuzat për drogë ndaj Bella Daggett u rrëzuan. Megjithatë, problemet e saj me autoritetet nuk përfunduan menjëherë. Pavarësisht se kishte qëndruar e ndaluar për gati një vit, asaj iu kërkua të paguante një gjobë prej rreth 3 mijë paundësh për tejkalimin e afatit të vizës.

Në mars, pothuajse një vit pas arrestimit, 23-vjeçarja arriti të kthehej në Britani, duke i dhënë fund pritjes së gjatë dhe ankthit të familjes. Për një kohë të gjatë, Bella ka shmangur të flasë publikisht për përvojën e saj në Dubai, për shkak të shqetësimeve lidhur me ligjet e rrepta të Emirateve të Bashkuara Arabe për kritikat ndaj shtetit.

Megjithatë, në shtator ajo vendosi të ndajë një mesazh emocional me rreth 22 mijë ndjekësit e saj në “Instagram”.

“Një vit më parë ndodhesha në periudhën më të errët të jetës sime. Kur shoh pas, jam shumë krenare për atë se sa shumë kam arritur të kapërcej”, shkroi ajo.

Bella shprehu mirënjohje për jetën e saj të re, njerëzit që e rrethojnë dhe mundësitë që ka pasur pas kthimit në vendlindje. Pas përvojës së rëndë në burgun e Dubait, 23-vjeçarja duket se ka zgjedhur një rrugë krejtësisht të ndryshme profesionale, duke e kthyer aktivitetin në platformat online për të rritur në burimin e saj të ri të të ardhurave.

Top Channel